Salai Zung Kip Thang cu ahawipa San Uk Lal cung i a thil tuahmi ruangah upat le conglawmh a tong ngaingai i mi tampi nih an thangtthat len. Salai Zung Kip Thang cu ahawipa caah zumtlak hawi a sinak le ahawipa cungah a tuahmi thil ruangah an umnak khua N. Hmuntha khuami hna nih hlunghlai taktakin upatnak an tuahpiak lai tiah theih a si.

Hmuntha Mino Community (phu) President Salai Lal San Pui nih Salai Zung Kip Thang Upatnak ding kong he pehtlaiin a chimmi cu “Hmuntha Mino Pawlkom (Comunnity/Phu) hna nih sunlawih/upat peknak program kan tuah lai. Khuami dihlak nih tuahpiak ve an timh ruangah Mino Phu le khuami nih hmunkhat ah sunglawi taktakin le hlughlai taktakin tuah kan i tim. Ani cu fiangfai in kan chim kho rih lo. Tuzarh chungah cun a si ko lai” tiah a chim.

Salai Zung Kip Thang cu Sekan khua ah a chuakmi a si. Asinain atu i an umnak cu Hmuntha khua Rehoboth Camping hmun ah an um lio a si. 1996, Tho 4 ah a chuak i a chuahpi unau hna cu Krish Pek Thang, Nehemiah le Van Lal Lian hna an si. Amah hi upat bik cangtu a si i a nu le pa hna cu Pu Tha Ling Zam le Pi Za Tin Par hna hi an si. A pa hi Zo Dihai khuami a si.

Ahawipa San Uk Lal cu a dam lo ruangah China in kawlram leiin ah a rak tlungpi i Khunming le Muse karlak ah ahawipa San Uk Lal nih a thih taak. Ahawipa Paul San Uk Lal ruak cu a puakin puak pahin le harsatnak tampi tuarin January 6 ah Falam khua ah a ruak a phakpi. Credit: CT Media/Cin Pak