Nihin July 6 ah Halkha tthu ralhrang rual covid kong meeting kan tuah e tiah an hun i laar. Mah kong hi sau nawn in ka vun ttial lai. Atu hi
Halkha ah Covid a um lonak sau ngai cang nain Covid minbunh in meeting tu le tu an hrihhawh le tuah pengmi zoh tikah a phen ah tinhmi an rak ngei ziar ko.

Covid min in meeting an tuah pengnak a ruang cu Lai upa le pastors hna meeting leemnak caah a rak si ko tiah ka ruah. Hi Covid min chuan khan cun meetingkai an i fawih deuh lai i,ralhrang nih meeting auh an i fawihnak lam si fawn. A meeting min cu Covid a si nain a chung bia hla ah cun agenda dang tampi a rak si ko lai. A ruang cu,Covid umlonak ah zarh chiar ti awk in Covid meeting tuah pengnak a ruang umlo, Civil upa le hruaitu hna he naihniam tein um an duh/timh caah a si ko lai tiah ka lunghrinh ziar hna.

Thawngdang Matupi-Lailenpi Khua Karlak SAC Ralkap Le CDF Kahdohnak Ah SAC Ralkap 3 An Thi! Chin ramkulh Matupi-Lailenpi lampi ah nihin July 6 zinglei ah SAC ralkap le tualchung hriamtlai phu kahdohnak a chuak. Lailenpi in Matupi lei ah ke in rallam sialtu SAC ralkap hna cu Ring khan khua le Ammilai khua karlak ah Matupi-CDF nih zinglei suimilam 9:00 ah an kah hna.

Kahdohnak cu minutes 30 hrawng a rauh hnu ah SAC ralkap 3 an thi i, 2 nih fak ngai in hliamhna an tuar. Kahdohnak chung ah CDF lei ah hliamhna tuar um lo in hnu an tolh ṭhan tiah theih asi. SAC ralkap nih Ringkhan khua inn 3 an khangh, tiah kahdohnak he pehtlai in Matupi-CDF nih cathanh an chuah.

Thawngdang KNU hmunram ah a luancia June thla chung ah SAC ralkap nih hriamngan kahnak in tualchung mi 12 an thi i, 15 hliamhma an pu tiah KNU nih cathanh an chuah. KNU-GawTuLay hmunram chung ah SAC ralkap le BGF hna an cawlcang thazaang an chap caah KNLA/ KNDO he nifatin kahdohnak a chuak.

Kahdohnak chung ah SAC ralkap le BGF hna nih khuate pawl cu hriamngan in an kah caah khuami inn 75 phungki sianginn 2 le cacawnnak sianginn 2 an rawh pinah tualchung mi inn 61 mei kanghnak in a ciam, tiah KNU nih an langhter. SAC ralkap le BGF cu ral tuk kan kal cang lai an ti poh ah tualchung mi hna cu, hramhram in an tlaih hna, an riahcaw le an thilri phorhter dingah tualchung mi motor an chuh hna. Cu pinah SAC ralkap nih hriamngan kahnak in tulachung mi 12 an thi i, 15 hliamhma an pu.

A thimi hna chung ah phungki pakhat aa tel tiah KNU nih an thanh. Atu lio cu KNU-ThaTone pengkomh Brigade 1, NyaungLayPin peng komh Brigade 3, Hpapon pengkomh Brigade 5 le DuPaLar pengkomh Brigade 6 hmunram ah kahdohnak a zual tuk caah a zammi hi sing khat leng an phan. Eidin ti rawl an herh tuk tiah theih asi. Mah thawngpang theih hnu cun thinlung zong alau ngai.