Salai Van Lian Thang Biachimmi Hi Fak Piin Ruah Ngaingai Ahau ICJ Biaceihnak: AHo Himnak Ca Hme Thla Kha Kan Cam?

Thawngpang

ICJ Biaceihnak: AHo Himnak Ca Hme Thla Kha Kan Cam? Sih-ni a hlanmi pawl si hna seh, Aung San Suu Kyi (ASSK) pumpak siseh, kum hnih chung UN experts pawl nih an khomhsuatmi UN Fact-Finding Mission report cu tuchun ah an hnon dih ko. Kawlram ah “genocide or genocidal intent” a cang lo, tiah kap tampiin an dirpi. UN nih Arakan ram, a hmun chungah luh i hlat-hlainak nawl an halmi le an onh duh fon hna lo.

Image result for icj gambia myanmar

Biahalnak: aho “sualnak” hen an phehpiak? United Nations Official News nih “Aung San Suu Kyi defends Myanmar from accusations of genocide, at top UN court” tiah tlangtaar hmangin thawng a hun thanh. Aho nih dah “DASSK nih Kawl ralkap a dirkamh hna lo” tiah a ti khawh rih lai? Chim ding khi um lo. Provisional Measures zong a hau lo, tiah an dirpi. Aho “himnak” khi dah an humzual?

Tutan Provisional Measures kong hi cu a zarh asiloah a thla in a kal hlanah ICJ biaceihbawi nih ruling an hun chuah te men ko lai. The Hague khuaah Lai angki aa hrukmi zong kha hmuh an si. Laimi a kalmi kha kan um pah ASSK dirkamh ah. Ruah awk kha a um len. Lai miphun hi:- Kawlram ah a sifakbik nan si, an kan ti. Vawlei pumpi ah UNHCR ah ralzaam sokmi milu tambik hi kum zeimaw chung kan rak si. Kumtin vawleicung ah UNHCR nih ramthum a kuat tambik milu hi kum zeimaw chung kan rak si.

Related image

Hi ruangah Norway ah Kawlmi barawzatte lawng an um lio ah Laimi a thongthong in kan um. Hi ruangah Denmark ah Karen le Kachin pahra hmanh an um lo lioah Laimi a thong in kan phan. Hmun kakip ah cuti nawn in asi ko. Kawl ralkap nih “an kan tuk, an kan thah, an kan vuak, pawṭa an kan suai, an kan tlaihhrem” tiah vawlei kakip ah kan kong a chimrel kho bikmi miphun kan rak si ve caah pakhat cu asi ko rua. USA cozah vuanci pipi tongin Guam tikulh in Laimi a zaza kha vanlawng in US Mainland chung a tomtom in luhpimi umchun kan si

Related image

USA cozah nih Material Support Bar tiah Chinmi USA luh a kham cangmi hmanh USA ramdang vuanci Ms. Condoleezza Rice tiang statement chuahter in Chinmi cu a kham ṭhan lo a titer khomi khi kan si. Chin ralzaam cu refugee status pek ti lo dingin UNHCR HQ, Geneva zungpi in biachahnak tuah cangmi hmanh a letter kho ṭhanmi khi kan si.

Image result for icj gambia myanmar

Chim duhmi: kan covo le akhunhzi kong ahcun a chimrel kho ngaimi le a cawlcang kho ngaimi miphun khi kan si. Nain, zeiruangah Tlangcung miphun (Kachin, Karen, Shan, Mon, Karenni, Arakan, ) hna nih “Rohingya bang hin kum saupi kanmah zong Kawl ralkap kut a tuarmi kan si ve dakaw” tiah lam hna an zawh, vawleipi hmaiah cathanh hna chuahin an dirhmun an langhter khawh lioah Laimi hi kan langh khawh ve ti hna lo? Laitlang ah aho himnak caah hme thla kha kan campiak? Ralkap suaimi 2008 Phunghram tangin a rami zalonnak hmete le zeimaw thawchuahnak bite a ongmi le akhunhzi fate teemco nakin a lungdi a riam colhmi miphun, a sang deuhmi political status a ruat ti lomi.

Image result for icj gambia myanmar

Ramthum phakin Laitlang um lio caan le ralzaam dirhmun si lio caan hnulei sining a philh ṭhan colhmi. Zeiruang setah hriam hi kan i put i ral kan thawh, zeiruangah ralzaam kan si i ramthum kan phak, timi fiangin a pemh kho lomi Kawl ralkap nih vun uk ah thi dengin au, tlawmte akhunhzi vun pekin tem-tuarnak vialte a philh ṭhan colhmi. Lungthin a hngetmi le a fekfuanmi dirhmun ṭha tein a ngeimi miphun kan si maw ti hi ruah awk khin a hun um deuh ṭheo tawn ko in a lang. Tuni ICJ ahcun hlan kum 30 chung vawleipi hmaiah ralkap cozah chan lio i an rak i pheh tonning te khan a hun si ṭhan ko. Hi bantuk hi kum saupi kan rak hmuh pengmi kha asi ko. Old habits die hard!

Image result for icj gambia myanmar

Hlan ahcun Kawl ralkap cu anmah tein an rak i pheh. Tutan The Hague khua ICJ biaceihnak ah Kawlram aiawh in a kalmi ASSK (Myanmar Agent) i a changtu asimi U Kyaw Tint Swe (Alternate Agent) hi hlan lio tein Kawl ralkap cozah a rak aukanhtu le phehpiaktu bawi pakhat a rak si ton cang. Tutan cu amah lawng kha asi ti lo. ASSK le sih-ni rual hna zong amah he an hun dir cang.

ASSK nih lamhmai a hun hruai. Kawlrawn ah lamzawh dirkamhtu milu a singsang in le Laitlang ah thlacampiaktu a thong dengin an hun ngei. Tulio Kawlrammi nih kan zawhmi lampi hi cu Kawl ralkap nih ṭha tein an suaisam i an rak design ciami roadmap to disciplined democracy lamthluan cungah a kalmi fang khi kan si. Tuni ICJ zongah cu an phahmi lampi cungah kal bu tein an lungthlitum kan vun khenmi khi asi ko.

Related image

Kawlram uknak ah security lei nawlngeihnak cu a ningpiin Kawl ralkap an kutah khan a um. ICJ ah Kawl ralkap nih teinak an co sual ahcun luarpar an kai lai, an sopaw lai, an ninghngal deuh lai i license to kill pek bantuk hna a lawh sual lai caah a fak dingmi cu Tlangcungmi kan si sual te hnga maw ti hi phan ciomi pakhat cu asi. Cucaah aho “himnak” ca dah thla kan cam timi cu kum 50 leng Kawl ralkap uknak tangah a um balmi miphun nih i hal hmanh khi a hau lomi a hun si. Salai VLT 11-12-19 (Salai Van Lian Thang Cinzah)

Leave a Reply