February 20, 2020 Chin Miphun Ni (Chin National Day) ah Chin ramkulh Thantlang khuapi ah tuahmi ah CNF ai awhin Dr. Lian Hmung Sakhong nih a chimnak ah Pu Lal Luai cu British Pawl nih an thah timi a chimmi cu atu lio Chinmi Mino lakah mifim cathiam sang ka i ngeihmi le bochan taktakmi UK ah a ummi Salai Van Cung Lian nih fianternak a tuah.

A chimmi cu “Dr. Lian Hmung Sakhong biachimmi cu aṭha. Ramkhel kong, mah tein uknak khawhnak lam kong a chimmi cu ka uar taktak. A chimmi hna chungin pakhatte chim duhmi ka ngei.Chin paralṭha Pu Lal Luai cu Dr. Lian Hmung Sakhong nih a chimmi cu tiva kamah British ralka nih an thah tiah a chimmi hi a dik lomi a si i a phuahcopmi a si” tiah Salai Van Cung Lian nih a chim.

A chim chap rihmi cu ” Tuanbia umtuning cu hitihin a si. Kum 1890 March thla ah Pu Con Bik cu ralthuam a chiah ruangah British emperor nih Chin ramkulh cu an rak lak dih. Asinain chikhat te ah ral a dai tinak a si lo. Chin ralkap pawl nih caan ṭha an ngeih fatin tein British pawl cu a thli tein an rak do tawn hna. 1891 March 21 ah paralṭha Pu Lal Luai hruaimi Thantlang peng Chin ralkap pawl nih Lt. Macnabb (political officer) le Lt. Mocatta hruaimi ralkap bu minung 150 ummi British column cu atu i Thantlang peng Hriangkhan khua kiangi La-Aw tiva ah an rak i do hna.

British ralkap 5 an rak thi. Chin ralkap leiin Thangzang khua mi Tlir Ceu a thi ve. Cuticun Pu Lal Luai cu ramlakah a rak lo diam. British pawl nih cun Thangtlang peng khuate pawl cu hremnak an rak pek hna i a meithal tiang an rak lak piak. A hnuah cun a chungkhar tiangin an rak tlaih piak. Cuticun Pu Lal Luai cu kum 3 renglo ramlakah a tlaunak in 1894 May 13 ah a rak chuak i an tlaih colh.

Pu Lal Luai cu an tlaih hnu zongah British cozah nih cuhlan i a rak ukmi Thantlang peng ah mi-uk sinak an pek. Asinan 1894 fuurpi lingcing ah a nunnak aliam. Pu Lal Luai tuanbia hna cu The Chin Hills by Carey and Tuck cauk chungah rel khawh le zoh khawh a si” Tiah Salai Van Cung Lian amah fb cahmai a langhter. Dr.Lian Hmung Sakhong nih a chimmi zoh khawh a si.

Note: Hi cabia hi Falamtime nih Falam in a ttialmi Halkha/Laica in kan lehtthanmi a si.