Chinpyine, Matupi myo, Sanbawng sang ah khuasa U Boi Ha le Daw Ri Zai hna i an dawtmi an fapa Salai Van Boi Thang (Thang Te) cu zualhma ngai in a damlo ruangah nizaan ah sizung lei panh in an tlikpi i meng 80 tluk hrawng an phanh ah sizung phak manh loin a nunnak a liam tiah theih a si.

Salai Van Boi Thang (Thang Te) cu Emergency in Pyimah sizung ah arannak in an tlikpi ko nain meng 80 tluk hrawng an phanh December 6.12.2020 zaan ah ruah lo piin a nunnak a liam hi a si. Salai Van Boi Thang nih a kaltaakmi chungkhar Bawipa nih hnem hram ko hna seh!

Atu lio kan vawlei thawngpang von cuanh tikah thawngpang chia lawng tein akhat. Atu lio lebang cu COVID-19 pulrai zawtnak ruangah mibu tonhpumh a ngah lo caah thil zong mah duhning in kal khawh a si lo. Cu chung lakah atu bantukin Chinmi chungi ngaihchaitnak kan ton hi cu lung a nuam hrimhrim lo. Kal taakmi chungkhar Bawipa nih hnem hram ko hna seh! Chrihchan: Chin Matu Media

Thawngpang dang rak rel chih: Thantlang in Sopum kalnak lam ah motor le motorcycle an i pah. Hakha Pengkomh, Thantlang khua lonh Sopum kalnak lam ah motor le motorcycle 2020 December 7 suimilaam 6:00PM tluk ah an i pah i a thimi an um lo nain faak ngai in an i khawng tiah theih a si.

“Thantlang in Sopum kalnak lam petrol dawr hmai ah a si. An i pah ning cu; motorcycle nih motor lonh aa timh lio ah atu bantuk in an pah hi a si. Motorcycle a khaltu pa hi a lu a kuai, a hnakhaw in thi a chuak i sii-inn ah an tlikpi colh,” tiah a hmun i a ummi pakhat nih The Hakha Post ah a chim.

Hma a pu mi pa hi Thantlang sii-inn lei nih an thlop khawh lo ca ah atu hi Hakha sii-inn lei ah an ratpi lio a si. Chirhchan: The Hakha Post

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtleih ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um  cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Na relmi thawngpang hna hi midang nih an rel khawh ve nak hnga aṭha tiah na ruahmi a um ahcun share in rak kan bawm ve. Kan ca a kan rel piaktu nan dihlak cungah kan ilawm. Upatnak he Admin