Chin pasaltha Salai Zung Kip Thang cu a hawipa San Uk Lal cungah a tuahmi thil ruangah upat le conglawmh a tong ngaingai. A hawipa cungah a thil tuahmi ruangah Falam Central Nunphung Pawlkom-Community (FCNP) hna nih upatnak le conglawmh (sunsaknak) ca an pek tiah theih a si.

Salai Zung Kip Thang le ahawipa Salai San Uk Lal hna hi China ramah hlawh fa in rianttuami an si i dam lo ruangah China ram in a tlunpi i Kunming le Muse karlak ah ahawipa San Uk Lal nih mual a liam taak. Ahawipa Paul San Uk Lal ruak cu Falam a nulepa sin ah phak pi ding hrimhrim in biachahnak fel a tuah i raltha tein a rak tlunpi. China ram in Falam tiang a rak tlunpi nak ah harsatnak tampi a um ve.

A caan ah lam le sul ttha a um lo i tupi chung lakah a hawipa San Uk Lal ruak cu a puak pah tawn. Cu ti te cu a hawipa ruak cu Falam khua tiang a rak phak pi hi asi. China in January 1 in an rak i thawh i January 6 ah Falam an phan. January 11 ah Salai San Uk Lal nulepa nih lunglawmh biachimnak le thluachuah peknak an tuah i cu lioah cun Falam Central Nunphung Pawlkom-Community nih Salai Zung Kip Thang cu upatnak le conglawmhnak ca an pek hi a si. Salai Zung Kip Thang hi Pu Thang Ling Zam le Pi Za Tin Par Tei hna i an fapa 4 lakah a upa bik changtu a si. A chuahkehnak khua cu Sekan a chuakmi a si i i N. Hmuntha an um lio a si.