Salai Ngun Thawm Thang Nih Ti Paamnak Mual A Kan Liam Taak (Ti a lionak hi honnak zong an tuah rih lomi a si)

Chin News

Falam Peng, Lailun duum ah a um mi ti lionak,2020 June 26 chun suimilam 12:00PM hrawngah Salai Ngun Thawm Thawng nih ti ah paamnak in mual a kan liam, ti thawng kan theih. Salai Ngun Thawm Thawng nih ti ah paamnak Lailun ti lionak hi an limnak caan zong a sau rih lo. Cun, hi Lailun ti lionak hi hmannak nawl zong an pe rih hna lo ti a si.

Ti ah a paam mi alai Ngun Thawm Thang hi Falam khuapi, Balai sang ah a ummi a si Pu Hrang Tin Lian fapa a si tiah kan theih. Ti a paammi Salai Ngun Thawm Thang hi kum (19) minung a si i hawile pathum he ti an i lionak atu bantukin vanchiatnak a ton hi a si.

Hi kong he pehtlai in The Hakha Post thawngzamhnak nih hitihin a taarlangh ve; Chin Baptist Convention in Rev. Dr. T Joshua nih, “Tlangval pathum an si i, an pathum ning in zu rit dawh an si. A thi mi pate hi kum 19 upa a si i, nihin 2020 June 27 suimilaam 10:00AM ah a ruak kan vui. Ti an i lionak hi a nawi pah rih. Cun a thuh lei zong hi pe 3 in pe 5 kar a si,” tiah The Hakha Post ah a chim.

Cun, Lailun duum hngak minung pakhat nih, “Ti lionak kan tuah mi hi honnak kan tuah rih lo ca ah hman khawhnak nawl kan pe rih hna lo. Kei hi ka nu a dam lo ca ah Falam sii-inn ah ka nu ka umpi. Ti lionak hmun pawng ah riantuan mi an um ko nain annih hi chuncaw an ei lio a si i an thei lo i a si lai. Ngakchia nih an thlauh len ko hna nain zei ah an relpiak hna lo. Ti chung a tlak lecangka in riantuan pawl cu an va auh hna nain a hmun an phak ah a nunnak a rak liam cang,” tiah The Hakha Post nih a taarlangh.Chirhchan:Sianglianuk Hmingte Kianghrol (CTM) & The Hakha Post

Leave a Reply