Thawngpang chia lakah thawngtha: Trump nih kan ram Myanmar telh in ram 6 cu ‘Travel ban’ ah a chiah hna. Nain ka ruah ning tluk cun Laimi harnak a kan pe lai lo.

Tourist/visit visa, student visa(non-immigrant) cu a block lo, nulepa/nupi/unau zungzal um ding auh thainak (immigrant) lawng a block. Nain, block cikcek timi cu a si lo, nupi or nulepa auh duh cun adang tein nawlnak(waiver) sawk khawh than a si ko. Zalawng tein Laimi nih US tlawn khawh lengmang a si ko lai, nain auh behnak belte cu a har hringhran ko cang lai tinak a si.

Thawngpang dang rak rel chih: 2008 Phunghrampi An Remh Kho Lai Maw? Kawlram phunghrampi remh dingmi cu Pyitaungsu hluttaw phunghrampi remhtu bu nih Pyitaungsu hluttaw ah an chuapi cang. Tuzan ah NLD, USDP, Ralkap, Shan party, SNLD le Rakhine party ti in minung 15 nih Pyitaungsu hluttaw chungah ceihhmainak an ngei cang lai. Chin ramkulh mindat hluttaw palai Pu Nay Lyn Aung zong nih biachimnak a ngei ve lai.

Tuzan ah ceihmainak an tuah dingmi pawl hna cu USDP le ralkap nih Pyitaungsu hluttaw ah remh ding in an chuahpi mi upadi hran phun 5, NLD party hruainak in pyitaungsu hluttaw nih an sermi phunghram remhtu bu minung 45 committee nih an chuahpi mi upadi hran 2 a si . Mah vialte cu hmun khat ah an komh dih I, phunghrampi remh dingmi upadi hran ah ser a si.

Phunghrampi remh dingmi upadi hran cu phun hnih ah an tthen than. Phun khat cu hluttaw palai minung 75% nak tam hnathlanak laak hmu ah ram pumpi ah referendum tuah a herhmi article 436 [a] he apeh tlaimi le hluttaw palai 75% nak tam deuh hnathlaknak lawng in remh khawhmi article 436[B] tiah phun hnih ah tthen a si. Ralkap pawl nih cun amah chuahpi mi pawl kha a dang tein ceihmainak tuah I, a dang tein vote thlak in biakhiah nak tuah an duh nain NLD hruaimi phunghram remhtu 45 committee nih an sermi upadi hran chungah an khumh chih lawlaw. Remh dingah chuahpi mi article pakhat cio kha ahohmanh theih khawh lomi catlap in vote thlak a si te lai.

USDP nih remh dingah an chuahpmi article hna cu, USDP in Chaungkung palai, U Thein Htun nih ramkulh le ramthen CM vialte cu rampi President nawl si ti loin mah le hluttaw cio nih thim khawhnak article 261 remh dingmi a si. Adang pakhat cu USDP in Myithila palai Dr.Maung Tin nih a chuahpi mi cu President nawlngeihnak tthumhnak kong a si. UDP palai thiamthiam a simi, U Sai Than Naing nih a cuahmi cu, Kalung tiah auhmi, National Security and Defence Council nawlngeihnak chap chihnak a si. NSDC meting thla hnih voikhat auh ding, NSDC chungtel minung 5 nih meting auh ding in an hal ahcun President nih meting auh ding timi pawl a telmi a si.

Ralkap palai, Colonel Aung San Chit nih remh dingah a chuahpi mi cu ramkulh le ramthen CM pawl cu mah le ramkulh le ramthen nih thim ding, ramkulh le ramthenah vuanci a tuan dingmi pawl vialte zong hluttaw le CM ceihmainak in rian pek khawhnak a si. Adang ralkap palai, Colonel Maung Maung nih a chuahpi mi cu President le Vice president si khawhnak tahfung a simi 59[f] bantuk in rampi vuanci vialte le ramkulh le ramthen CM vialte tahfung ser chih dingmi a si. Mah tahfung tuah an duhmi nih hin Aung San Suu Kyi cu President lawng si loin rampi vuanci, ramkulh le ramthen vuanci tiang zong tuan kho lo ding tiangin a kham khotu dingmi upadi a si.

NLD party nih remh dingah an chuahpi mi cu article phun 114 a si. A biapi bik in ralkap pawl nawlngeihnak tthumh ding a si. Ralkap nih hlutaw kip ah 25% thutdan an laakmi cu 2020 hnu ah 15% ah tthumh ding, 2025 ah 15% thumh ding, 2010 ah 5% tiang thumh ding timi a si. Rampi ramkhelrian ah ralkap an I tel lai timi zawn ah mipi hna tlaknak in timi NLD nih telh chih an duh. Rampi vuaci pakhat a simi, Border Affair vuanci cu kalung timi , NSDC ah tel ti lo ding in hrawh an duh. Asinain NSDC ah Phythu hluttaw vice chairman le Amyotha hluttaw vice chairman minung pahnih telh chap an duh. Cun Aung San Suu Kyi rampi President si kho lo ding in a khamtu, article 59[f] kha hrawh dih an duh. Phunghrampui remh tik ah75% nak tam timi zawn ah khan hluttaw palai cheuthum cheuhnih nak tam hnathlanak in ti in remh an duh.

NLD le ralkap+USDP nih then an duhmi cu van le vawlei in a dang. Ralkap le USDP nih ramkulh le ramthen CM mah hluttaw nih thim khawh cionak dah ti lo, a dang vialte cu remh si loin a rengh lei rengh chin an duh. Cucaah democracy le Federal taktak an pom loning a lang chinchin. Hluttaw chung thumi ralkap 25% tthumhnak kong pakhat hmanh an chim duh lo. President le CM si khawhnak tahfung tiang in rengh chinchin an duh. Kalung timi National Security and Denfence Council zongah ralkap nawlngeihnak chap chih an duh. Ralkap nih hluttaw chung thumi, 25% hi thumh duh hna seh, cun President tangah ralkap vialte hi um hna sehlaw tlangcungmi hriamtlai pawl zong nih fawi tein NCA minsen an thut lai I, kan ram ah thlennak a rang deuh hnga.

NLD nih ramkulh le ramthen CM paoh mah le hluttaw cio nih thim khawhnak pohmah 261 kong remh dingah an chuahpi lo. A ruang a um, hluttaw chung thumi ralkap 25% an thumh le remh ding, ralkap nih 25% an thumh duh lo ahcun remh rih lo ding hi an duh deuhmi a si lai tiah zumh a si.
2008 phunghrampi a remh khotu ding hluttaw palai minung 654 an um. Article pakhat asiloah pohmah pakhat remh khawhnak dingah hluttaw palai 491 nih hnathlak pi a hau. Tulio Pyitaungsu hluttaw chungah NLD palai 383 an um. Ralkap palai 166, USDP party, tlangcung party le adangdang palai 105 an um.

2008 hunghrampi thleng khotu ding cu NLD le ralkap hi a biapi bik an si. USDP party, tlangcung party le adangdang party tel bak loin ralkap le NLD lawng nih phunghrampi hi fawi tuk in an remh khawhmi a si. Zeicahtiah phunghrampi remh khawhnak dingah palai 491 a herh. NLD palai 383 le ralkap 166 fonh ah palai 549 an tling.

Cucaah tutan hluttaw nih remh an timhmi 2008 phunghrampi cu NLD le ralkap phu hnih hna nih remh an duhmi lawng an remh khawh lai tiah zumhnak ngeih a si. Tutan ceihhmainak ah phunghrampi remh a duhmi le duh lomi cu a hung fiang ngaingai lai. Salai Lairamthang