Uknak firtu Min Aung Hlaing nih Chinram chung a tapeh lutlai tuantu ding minung pakhat a rak thim i cucu cheukhat nih an lawmhpi len ko. Ralkap tapeh tuan hmanh hi sang tuk ah a ruat rihmi sal lungput fih a nun zia mu. Mah pumpak hlawknak caah cun mifir tapeh tuan zong aa lunghmuih ngaimi sal lungput.

Salai Lungthli tum nih a chimmi cu, hihi a si:Ralkap nih Uknak laak chung ah Chin Ramkulh Hruaitu ding thanh a si cang. Ralkap nih Myanmar ram Uknak an laak hnu ah Cozah Hruaitu thar an thim hna i, Chin Ramkulh hruaitu ding ah Pu Terrace San Mawi Nikhuai an thim.

Pu Terrace San Mawi Nikhuai hi Chin Ramkulh, Falam Peng, Lumte khuami a si i Wana Kyaw Htin Dr. Ni Khuai fapa a si, tiah kan theih. Pu Terrace San Mawi Nikhuai cu Chin Ramkulh Tayar Hluttaw Lutlai a tuan lio mi a si i Ralkap nih Uknak a laak hnu ah Chin Ramkulh Hruaitu ding ah an hun thim mi a si, tiah Myawaddy thawngzamhnak nih a thanh. Source:Democratic Voice of Chin-DVC

Hluttaw Palai Sipin Riahbuk ah chiah mi hna cu tlunnak nawl an pek cang hna. Hluttaw Palai thar Hluttaw Meeting kai ding ah aa thawh i Nay-Pyi-Taw Sipin Riahbuk ah aa thum mi hna cu February 2 ah Ralbawi pakhat nih nanmah le siaremnak in nan tlung kho cang tiah a chimh hna.

Hluttaw thar meeting cu February 1 ah tuah ding a si nain Ralkap nih Uknak (Aa-naa) a laak ca ah meeting tuah kho ti loin an riahnak Sipin Riahbuk ah an erh hna i February 2 zaanlei sang ah nan tlung kho cang an ti hna hi a si. Hluttaw Palai hna cu an umnak hmun kan thial hna lai, tiah biachawkvai a chuak ngai nain February 2 ah tlunnak nawl an pek than hna. Ref: DVB (Democratic Voice of Chin-DVC)

Hakha inn kangh ningcang a fiang cang. Hakha ah Pu Hrang Cung le Pu No Hnin inn a kaang, minung 6 an thi. 2021 February 2, zinglei 5:40 tluk ah Hakha Dillo Sang um, Zokhua khuami Pu Hrang Cung le Thantlang Peng Hriphi khuami, Hakha um, Pu No Hnin inn a kaang, Pu Hrang Cung fale 5 le a nau fa 1 an thi.

Hi kong ah inn ngeitu Pu Hrang Cung nih, “Voidang tawn ahcun zinglei suimilaam 3:00 ah hin ka tho i rawl ka chuan dih tawn. Zahan cun ka mitkuh a thaw tuk i kaa hlau kho lo. Kan uicote a bao tuk i kaa hlau. Ka vun i hlauh ahcun meikhu kaa haak cang. Tho zokzok u, tiah ka au i kan nu cu a tho manh. Thlalangawng ka bauh i ka fale pahnih cu ka hlonh (leng ah chuah) manh hna. Kan nu he kan zaam manh ceo khi a si. Ka naufa Samuel zong aa tel. Ka fapa Amon Bawi Chit Htoo hi kan hnuleite ah motor nih a pah i a ke kiah ca ah a zaam manh ve lo. Zeitin mei kangh aa thok ning zong ka fiang kholo,” tiah The Hakha Times ah a chim.

Hi kong ah Hakha Meithat Zung lutlai Pu Thian Nuam Maung nih, “Inn kangh aa thok ning kan hlat lengmang tik ah an inn hi dot thum a si. A dot hnihnak ah hin electric in rawl an chuan tawn. Cucaah, electric plug in aa thok lai ti cu a fiang ko. Cun, thiri a ciam mi man hi kan tuak khawhtawk ah tangka in Ks. 264,000 a si,” tiah The Hakha Times ah a chim.

Innpa Pu No Hnin inn pakhat zong a ciam ve nain innhlaang hi Lo ah a riah kar a si ca ah annih chung cu an luat. Pu No Hnin inn hi inn hnih a si i inn khat cu a ciam dih. Anmah chungkhar umnak inn tu cu a him. A thi mi hna hi kan theih tawk ah; Par Tha Hlei, Ngun Sui Par, Amon Bawi Chit Htoo, Ngun Cin Hniang, Ngun Tha Len, le Samuel an si, tiah kan theih. Biakilh: Update news kan thanh than te lai. Source: The Hakha Times

______
Copyright © Chin World News Evening