Salai Lungthli Tum: No Than Kap Nih CNA Ralkap Tampi A Thahnak, Phiasa Ningcanglo In A Hmaan Ruangah Hruaitu Sinak In An Chuah

Hmuhning

No Than Kap doh hi Falam doh si lo, miphun thencheutu pa doh a si. CNF hotu a tuan lio ah CNA ralkap nih traning tuah lio an i cer nak ah Hakha holh an hman kha a theih i a thinhung, meithal tiang voi tam nawn a puah. Amah nih hramhram in Falam holh lawnglawng a hmanter hna(CNF statement, 2007).

Ningcanglo power a hmannak, CNA ralkap tampi a thah hna nak, nu kong buaibainak le phaisa ningcanglo a hmannak vialte cu CNF upa nih an zoh tikah ‘a si kho ti lo, midingfel lo nih a kan hruai awk a si ti lo’ an ti i Pu No Than Kap cu Pu Zing Cung le Pu Roger Biak Lian hruaimi phu nih CNF hotu sinak an rak chuah kha a si.

CNF in an chuah hnu ah CNF thi/tlu seh timi saduhthah he CNF a chiatnak a dih dongh tiang a rak aupitu than. ‘Hakha nih power an duh ruang ah Falam cu CNF party an kan chuh, aa-na an kan ting’ tiah Falam kan unau lakah CNF huatnak thlaici a tuh. Amah pakhat lawng an thawl ko nain Falam dihlak an kan thawl tiin a mer khawh.

Anih hi a fimzer, zeitindah ‘power ka ngeih khawh lai’ timi strategy fiang tein a theih. CNF huatnak thlaici a vorh dih hnu ah heh tiah Hakha le Falam kar huatnak thlaici a tuh than. ‘Aw! Falam’ timi Hakha huatnak cauk tiang a chuah. A cauk ah ‘Hakha nih Falam cu khualipi sinak an kan chuh’ tiin a tial i Falam mino lakah Hakha huatnak a karhter.

No Than Kap strategy cu ‘Falam lakah Hakha huatnak karhter, cucu-khakha an kan chuh tibantuk aupi. Cun, amah lawng kha Falam a chanchuah khomi hruaitu ah i chiah’ khi a si. Mah kha 2010 hlan huatnak thlaici a tuhmi cu a si. 2010 hnu Thein Sein cozah chan ah Falam holh cu ‘Chin official holh’ ser ding a hal rih. Zinghmuh tlang ah Chuncung mino nih ‘Hakha Township’ timi lungphun an sermi zong nikum 2018 ah No Than Kap hruainak in man cikcek an khuai fawn. A lung ai thleng nan ti kho lai maw?

Hi bantuk midingfello minung nih a hruaimi party (No Than Kap party CNLD) an thawn ding khi kei cu ka tih ngaimi a si. Pu Zing Cung le Pu Roger Biak Lian hna nih hruaitu caah ai tlak bak lo tiah an ruah i an thawlmi pa kha atu lio miphun ka daw ai timi mino tampi nih ‘kan pu’ tiah nan auhmi khi ka thlingzaa ngai.

Miphun ka dawt ti tung i Chin miphun lakah thencheunak thlaici a tuhmi No Than Kap tanh, a hruaimi party zong power pek timh khi Chin miphun rawiphir phun khat a si. CNF belnang neh zong a si fawn. Nan theih ding ah Pu No Than Kap a dam chung cu David Ngaisak(Matupi) nih zeitik hmanh ah CNLD hotu tling a tuan kho lai lo, No Than Kap nih tactic a hman lai i amah peng khi hotu lutlai bik a si peng lai.

Cun, No Than Kap doh khi Falam doh a si lo, Falam a si ruang ah ka doh lo, a tuahsernak a tha lo caah ka dohmi a si. NLD cozah Chief Minister Pu Lian Luai khi Falam a si ko. Ka doh lo, a tanpi bikmi keimah ka si. Falam huatu ka si lo, nain No Than Kap a huatu cu ka si. Cucu, miphun ka dawt caah a si tiah kai ruah.

Leave a Reply