Salai Lungthli Tum Nih Velh A Tongmi Thang Zang Khuami Tlangvaal Ngun Dawt Bawmhnak Ting 2 A Pek
Nizaan ah Hakha a ummi Thang Zang khuami Hakha ummi tlangvaal Ngun Dawt cu Hakha Mucu sangah a ummi Tiphul khuami tlangvaal Rual Bik Thawng nih a velh ti thawng kan theih. An vuaknak a ngeihchun a phone zong an hrawhpiak ti a si.
Cu kong cu Lai mino nih kan ibochan ngaimi, Salai Lungthli Tum nih a hmuh ve i a celh ve hirm lo. Kan naupa Ngun Dawt phone cawknak caah tiin ting 2 bawmhnak a pek tiah kan theih. Lawmh a um hringhran. Zohchun awk tlak ngaingai a si.
Salai Lungthli Tum,“Hakha ah velh a tongmi Ngun Dawt he phone kan i chawn kho. Ka si khawh tawk in thazaang ka pek. An velhnak ah a phone screen kuai dih caah tunai kha phone thar cawknak ding ting 2 cu ka naupa ka va pek ter cang. Kan Hakha ah kha bantuk mi velh um hram ti hlah seh. Zoh ah lung a fak tuk,” tiah a facebook cahmaiah a taar.
Vuak a tongmi Ngun Dawt konglam rak rel chih: Nizaan ah Hakha a ummi Thang Zang khuami Hakha ummi tlangvaal Ngun Dawt cu Hakha Mucu sangah a ummi Tiphul khuami tlangvaal Rual Bik Thawng nih a velh ti thawng kan theih. Cu lawng hlah a pawngkam i a ummi ahawile nih Video an thlak i, anmah hawile tete video an i kuatnak ah facebook tiangah a phan i mi tampi nih an hmuh.
A hmuhtu vialte an thinhung cio i an lungfak an ngaihchia cio. Cu chinchap lo ah an vuakmi pa Ngun Dawt hi ngakṭah a si hleiah amah hi mi dam lo a si tiah kan theih fawn. Cun, laitlang leiah a ummi a chungkhat hna zongah Hakha ah an kai hna i a herhningin upadi ningin kan tawlrel lai an ti ve cang.
Tlangvaal Ngun Dawt hi ngakṭah a si bang, amah a zohkhenhtu a umnak Pi Zing Hlem nih hitihin a chim ve,“ A voikhat cu an dihlak/an zah tein an velh i video an thlak manh lo. A thi a chuakmi an ṭawlter i cu hnuah video hi a voihnihnak an velh lio an thlakmi a si. Tlaih cu chim lo a bawmmi lawnghte an si minung pa 7 an si,” tiah a chim.