State MP caah Pu Lal Maung Cung thim awk a sinak aruang – 2

1. Pu LalMaung Cung cu a dang hmunhma thim awk a ngei lo. Rampi MP cu a ngamh deuh lai lo, peng dang in luh ahcun a tlin lo ding a fiang cia. Thantlang peng State MP hmunhma a tin lo ahcun thimnak luh lo a hau ding a si. Khitluk party caah a caan le chawva a pek i tukum thimnak luh lo ding cu a caah a fak tuk ding khi a si.

Nain, Salai CeuBik Thawng cu thim ding hmunhma tampi a ngei. Thantlang peng in Rampi Hluttaw hmunhma le Hakha peng in State MP or Rampi MP hmunhma ai thim khawh. Hakha peng in ai cuh zong ah tanpitu tampi a ngeimi a si i teinak a hmu kho ko. 1990 election lio hmanh ah Pu Lian Uk cu Hakha peng in a rak i cuh i a tling ko. Atu zong peng dang in mi tampi an rak i cuh ko.

2. State MP cu vuanci tuan khawh lo ahcun zei pipa rian an tuan khawhmi a um lo. A chel ah meeting an thu i budget thenphawt kong luala an ceih i caan a dih tawnnak hmun a si. Zei pipa an tuan khawh lo ning cu atu lio Dr. Hmuh Thang le Pu Van Thawng khi hmuh khawh an si. 2010 ah a tlingmi Chin party MP zong kha zei pipa an rak tuah khawhmi a um ve hlei lo.

State Hluttaw ah zeibantuk federal kong ceih zong a um lo, tuhnu zong ah a um lai lo, a um phung zong a si lo. An rian a si lo. Nain, Rampi Hluttaw ah cun kan ram caah a biapi bikmi upadi tampi an ser, an remh i hlonh awk an hlonh. Ram sersiam ning an ceih. Rampi hruaitu president tiang an thim. Rampi tungmer nak hmunhma a si.

Federal halnak ding le ceihnak ding hmunhma zong Rampi Hluttaw khi a si. Salai Ceu Bik Thawng hi federal kong a aupi ngaimi a si. Kanmah lawng federal a duhmi kan si, federal duh ahcun kanmah vote kan pe u timi a aupitu zungzalmi a si.

Nain, atu cu federal kong ceihnak hmun ah i cuh i tim loin State luala ah i cuh ai tim khi sullam a um lo. ‘Tisartlam tlaih kai timh, ka zum ko u’ tiah mipi hmai aukhuan len i Timit va ah Lai meithal puahceh he tisartlam va bawh he ai lo. Cucaah, State MP caah cun Salai Ceu Bik Thawng a pam tuk, CNLD EC nih Rampi MP hmunhma an ser piak awk a si. NLD candidate Pu Chan Ham cu tih tuk awk a si lo. Pu Lal Maung Cung nih a ngamh tuk ko lai, a tei ko lai zong ka zumh. Tampi nih nan chim bang, Pu Lal Maung Cung nak cun Salai Ceu Bik Thawng cu zumh a um deuh hen ta.

Caṭialtu: Salai Lungthli Tum