‘Federal kan aupi lai, 2008 Constitution kan remh lai’ timi hi CNLD phu nih an aupi bikmi a si. Nain, CNLD lutlai vialte khi union hluttaw si loin state hluttaw ah thimnak luh dih an i tim.

State hluttaw cu federal kong ceihnak hmun a si lo, 2008 Constitution remhnak hmun zong a si bak lo. Nain, anmah nih cun state hluttaw ah 2008 Constitution remh an i tim ko rua. Hypocrites!

Cheukhat cu state MP hmunhma kha uico saruh cuh bang an i cuh, an mualpho beh. Miphun dawtnak lungthin he pakhat ai ngol rua kan ti, nain a chung muru in a zual chinchin. An aa-na an hmang veve i an i phuah veve. Khuaci an mui, saruh ruang uico rual an i seh bang.

Salai Lungthli Tum nih Laitlang khuate bawmhnak a pek hna;Laitlang khuate ah rian zong a tuan kho ti lo i cawmtu fale zong a ngei lomi harsa taktak an tam tuk. Tampi cu khuami nih zohkhenh hna hlah sehlaw ei awk rawl hmanh a ngei lomi an tam lai, zoh ah zaangfak tuk an si hna. Kan pekmi hna lakah a vansang tukmi zong an um i mah bantuk hi cu thla 3 dan voikhat tibantuk bawmhnak pek than khawh zong kai zuam lai, dam tein ka um ko ahcun.

Hakha peng ah a harsa ngaimi chungkhar 144 cu 20,000 cio bawmhnak kan pek khawh cang hna. Senthang nichuah lei, Zokhua peng le Mie peng cu kan pek dih cang, ting 29 a dih. Tuzarh chung ah Senthang nitlak lei kal rih ding a si. Ka hawile Bawi Bik Thawng le PaTum Vawngtu nih nili le zaanli riah in khuate vialte an kal hnawh hna i an va pek hna hi a si.

An cung ah lawmh lo awk a tha lo. Fur lio a si caah lam a chia i an tha a ba tuk ko lai. Nain, harsami lung an lawmhter caah an thabat man a sunglawi khun ka ti. Thantlang peng lei zong zarhkhat riah in kal rih ding a si. Hakha peng nakin khuate a tam deuh caah a rau deuh lai, ka hawile zong an rethei deuh te lai. Caṭialtu: Salai Lungthli Tum