Salai Lungthli Tum Nih A Degree Ngeihmi (Laakmi) Vialte A Phuan Dih A Rak Turu Bak Ko

Hmuhning

Degree a ngeilo aka timi pawl caah. Aka rem lomi cheukhat nih ka cawnnak kong ah a dik lomi an tial len caah fianternak ka rak tuah. Cawnnak kong tial hi mah le mah i fak a lo caah tial ka duh lo ngai nain.

No photo description available.
India ah minthang a simi Loyola College in BSc ka dih. Degree hi University of Madras nih pek a si.

Kei hi a thluak thami ka si bak lo, ca thiam cazin zong ah chiah tlak ka si lo. Nain, a lung ngan taktakmi le tei a duh bak lomi cu ka si. June thla 2008 ah Hakha in tanghra ka awng i 2009 ah India ka phan, kum khat chung Bible sianginn ah English ka cawng. Ka saduhthah cu India ram chung top 5 tang a ummi college ah admission ngah khawh ding a rak si.

No photo description available.
MBA zong Cardiff Metropolitan University in July 29, 2015 ah tlamtling tein ka dih.

Loyola College, Chennai hi 2009 ranking ah India ram chung Art&Science college vialte lakah top 1 a rak si. India ram chung ah admission ngah a har bikmi sianginn a si ve. Mah ah cun interview an ka tuah i tlamtling tein admission ka ngah khawh. B.Sc. cu kum 3 ka kai i subject tampi ah distinction(mark 80 cung) ka hmuh. May, 2013 ah ‘First Class’ in ka dih.

Image may contain: 1 person
Ramdang sianginn kai duh ahcun English testnak phit a hau, IELTS hi a lar bikmi a si. Band score 9.0 tiang a um i kei hi 6.0 ka ngah.

Certificate ka ngah le cangka in July, 2013 ah Hakha ka rak tlung. Hakha ah zarhhnih lawng ka um. August 3, 2013 ah Yangon ka phan. Mi tampi nih kum tampi tuition an kai i an awn khawh lomi IELTS(English test) cu tuition kai loin August 29, 2013 ah ka phi. Band score 6.0 ka ngah.

No photo description available.
DBA caah cohlannak ca a si. Sianginn man first payment £8,000 ka pekmi zong hmuh khawh a si.

England ah MBA(Master of Business Administration) kai ding sianginn ka sawk, bachelor ah ‘first class’ in ka dih hlei ah interview ah an lung ka tlin caah college fee 50% scholarship an ka pek. February 12, 2014 ah London ka phan i 2015 ah Cardiff Metropolitan University in MBA cu ka dih.

MBA ka dih hnu in DBA(Doctor of Business Administration, PhD level) ka kai than, ka kainak sianginn cu London School of Commerce timi college a si, degree petu cu University of Wales Trinity Saint David a si. Sianginn minthang tuk cu a si lo, nain sianginn fee a niam deuh caah kai thimmi a si.

Class based hi kum khat kai a si i a tangmi cu mah tein thesis tial a si. Class based kum khat cu ka dih, nain thesis cu ka dih naisai rih lo. Tuan ah dih zong kai tim lo, ka business rian ah biapi deuh in ka focus caah a si.

Note: Ka tarmi hmanthlak ah personal information tampi ai tel, nain original langhter a hau caah zeihmanh ka khuhmi a um lo. Biadang ah, ka chuah kum taktak cu January 1, 1991 a si. Credit: Salai Lungthli Tum

Leave a Reply