Admin||05| Biangreithlep 08|2020|| Hmawngtlang hi Zophei ram ah cun ai rem bikmi hmun rawn ah a ummi a si. Hakha a cimh lio kha Hmawngtlang ah thial ah a tha bik lai timi ruahnak zong a um bal. Hi khua dawh ah Senthang, Lautu le Zophei an i cawh dih. An khua ah siizung, police sakhan le meithat zung tiang a um cang. Zophei khua lakah ‘myo’ pek tlak bik tiah ruahmi a si. 2015 ah Leitak khuami inn 100 leng cu Hmawngtlang khua thlang te ah an rak i thial. Hakha Khuathar sang le Kokkun sang nakin an i naih deuh cang. Phundang chim ahcun khua khat bantuk an i chuah cang. Tha tein khua hnih kar remdaihnak ser kho hna sehlaw kap hnih caah a thahnem tuk ding a si.

1. Leitak nih Hmawngtlang khuami bantuk tein Hmawngtlang siizung, police le meithat zung an hman khawh lai. Leitak ah a dang sak len le phaisa dih len a hau ti lai lo. 2. Leitak nih thancho kan duh, Hmawngtlang he i fonh in khua nganpi serti kan duh an ti zungzalmi a si. Hmawngtlang khua taw ah Leitak nih inn an sak khi Hmawngtlang nih doh len awk hrim a si lo. I lawmh ngai awk a si, Hmawngtlang khua a ngan deuhnak tu a si.

Inn tampi sa cio hna sehlaw khua hnih ai peh dih lai i Hmawngtlang khua cu Zophei kan dihlak caah khuapi bik ‘myo’ tiah cozah nih a cohlang te hrimhrim lai. Hmawngtlang myo a ngah tik ah cun Hmawngtlang cu Hmawngtlang khuami le Leitak khuami ca lawng ah a si ti lai lo, Zophei kan dihlak le Laimi kan dihlak caah kan khuapi dawh a si te lai. Credit: Salai Lungthli Tum