Salai Lungthli Tum: MAH tapeh Ngun Cung Lian hi CNF zamtak in MPC ah a rak tuan lio kha cu ka mawhchiat tuk lem lo, nain NLD cozah an kai hnu ah MPC an hrawh i riantha a ngei ti lo caah riantha a pe than kho ding USDP le ralkap an tanbo ah ai cang. Wirathu le Hla Shwe a uartu hna nih cun an hun uar ngai.

MAH nih uknak a lakmi zong hi NCL cawlcawnghnak aa tel ve lai ka zumh, atu cu ai ruah chan bantuk tein MAH a ke tawl piaktu ding caah riansang an pek cang. Chin miphun minchiattertu le belnang nehtu Ngun Cung Lian, phaisa in cawk khawhmi man fawi bik minung.

Relchih: Hriamnam A Ngei Lomi Mipi Nih Ralkap Kan Tei Hna Lai – A Ruang? Kan Bible tuanbia lak ah pa nganbik le pa thawngbik a hohmanh nih an tei kho lomi Goliath teitu cu pa tiatum lo David a si. David nih Goliath teinak dingah hriamnam tha le hriamnam ngan a hman lo. Chai le lung tekep men a si ko. Zeicahtiah teinak cu hriamnam ah a si lo i Pathian kut ah a um ti kha David nih 100 ah 100 a zumh.

Cu ve bantuk cun zei hriamnam hmanh a ngei lomi mipi nih hriamnam tling te a ngeimi rampi ralkap bu hi kan tei hna lai. A si kho lo a timi an um. Nain a si kho tuk. Kan theih bantuk in Kawl ralkap cu an milu sing 5 leng kai an si, Asia ram lak hmanh ah ralkap thazaang a thawng ngaimi an si ve ko. Sinain tutan ah Mipi kan lung aa rual ning zoh tikah tei khawh lonak ding um lo. Mah belte hriamnam ngeimi kan si lo caah kannih kan mi teinak cu kan thazaang le lungrualnak a si.

Mipi Sandah an piah ning, mino hna an cawlcangh ning le zan ah sangkip an cawlcangh ning le an lung a rual ning zoh tikah ralkap an lung a mit cang. Sandah piahmi hna zong a tak cun Thihruai tu tha hmanh an ngei lo nain mi pakhat cio nih siikan an ngeih. Mi bia an ngai dih. Chim tu si nak in tuah tu si an i zuam dih hna.

Cucaah tutan cu ralkap an sung hrimhrim. Kum dang he tahchun ding si lo. Nikhat hnu nikhat mipi lei ah vuanthan an dir. Palik le ralkap zong mipi lei an i mer thluahmah. Ralkap le palik an lung a dong ziahmah. An tha a dih thluahmah. Zei tuah awk theih lo ah biatak in hran le mi tleih in tan an la. A sau an nguh ti lai lo. A tak cun mi tleih le hran kha teinak chuahpi tu a si lo. An sualnak a ngan tertu le an dantatnak a ngan ter chin tu khi a si lehlam.

Tutan cu Pathian hrimhrim kan lei ah a tang. Minung a tingtang in ni 18 leng sandah an piah cang nain a nih cu a tlu i a thi ti le accident an tong i cu zat cu an thi timi a um lo. Thil mak tuk a si. Pathian mi hna aunak in Jericho vanpang pi cu a ni sarihnak ah a cim ko kha. Zumtu hna caah hriamnam cu meithal a si lem lo. Cucaah Kannih kan rian cu David bantuk in Pathian nih zeidah a tuah lai timi tu kha zumhnak he cuanh ding a si. Kan hlawh a tlin hlan le teinak kan hmuh hlan ah lungdongh lo ding a si lai. Pathian kan lei ah a tang. Teinak cu Amah ta a si. Credit: Saya Tluang Ceu Thang