Buh le meh thaw chuan piaktu Pu Ngaisak, a eitu ding Nothankap. “Kawi Tum, Pu Ngaisak nih pei Facebook ah a tial i CNLD chairman cu ‘keimah ka si cang’ a ti kha. Nothankap cu chairman a si ti tung lo, zeidah tih awk cu a um ti?” tiah ka hawi pakhat nih ca aka kuat. Aw! Pu Ngaisak cu buh le meh chuan piaktu menmen a si timi pei ai fian lo hi ka ti.

Aho hmanh nih thim lomi CNLD chairman pathum an um, thlaruk dan ah chairman sinak an i thleng. Nothankap le Zozam nih thla 6 veve an tuan hnu ah Pu Ngaisak kha June 12, 2020 ah chairman an tuanter ve i November ah ai din te lai.

Election hi November ah tuah ding a si. November ah teinak an hmuh sual ahcun Pu Ngaisak nih a chuan ciami buh le Lai arsa meh cu Pu No Than Kap or Pu Zozam nih vuai ngai in an ei te lai tinak a si. Nothan Kap tapeh pawl cu nan i miak bak lai hi, hngar nan um pah, weight ka thumh lio si hlah sehlaw kan hrawng ve hna hnga.

Chairman sinak kha ‘pupa ro’ bantuk ah a ruatmi CNLD chairman pathum. Zohchia tuk in 2015 ah an sung caah ‘a si kho ti lo, kan i fonh hrimhrim a hau’ timi biachahnak an tuah. Nain, kum 3 hrawng chairman sinak an i cuh i an mualpho beh, an lungdong hnu ah pathum nih chairman an tuan thai.

Mah hna pathum(No Than Kap, Ngaisak le Zozam) hi chairman caah aho tal hmanh nih kan thimmi an si lo, anmah nih chairman sinak kha ‘pupa ro’ bantuk in ‘keimah ta a si, hohmanh nih an ka chut kho lo’ timi ruahnak an ngei. Hi ruang ah luthum an umnak a si. An i thawh riangmang i Chin timi min an hman ruang menmen ah ‘Chin miphun aiawhtu party kan si, thazaang a kan pe lomi poah cu miphun a daw lomi nan si, NLD cu Kawl party a si, NLD tanh cu Kawl miphun tanh a si’ tiin miphun thleidannak kha an thazaang caah an zuar.

CNLD nih an party hruaitu thim an duh ahcun fawi tein an tuah khawh ko. Ram tha i party hruaitu an thim hna bantuk in mipi thimter ding cu a har deuh lai, nain phaisa tam dih loin pengkip EC nih thim khawh a si. Mah zong cu luthum nih an duh lo.

Hruaitu sinak kha Pathian nih anmah ca thengte ah pekmi Pathian ro bantuk ah an ruah. Hi bantuk aa-naa-sin ruahnak a ngeimi hruaitu hi Nothankap tapeh CNLD member ca lawng ah si lo, Chin miphun kan dihlak caah tihnung bikmi an si.

Note: Mipi nih hruaitu thim ding sisehlaw David Ngaisak cu thim a tlak tiah ka ruahmi a si. A dang pahnih cu ‘no’ bak si. Credit:Salai Lungthli Tum