The Chin Post: Chin ramkulh, Tedim peng, Laitui khuami pakhat cu ti lam serding in a kalnak lam ah August 8 ahkhan bomb hmanhmi i lamhsualnak in hliamhma tuar, tiah tualchung mi pakhat nih a chim.
Laitui khuami Salai Kam Za Hmung kum 40 cu fur caan ah a rawk lengmang mi an ti ratnak lam ser ding in a kal lio ah bomb i lamhsualnak in a kee ah hliam a tuar, tiah khuami pakhat nih a chim. Cu bomb cu mi zei phu nih an hmanhmi a si zong kan hngal lo, kan umnak lei ah cun kahdohnak zong um lo, tiah a chimchap.

Laitui khuami pakhat nih bomb aa lamhsualnak kong he pehtlai in SAC ralkap lei media, Fifty Two News nih cun, Sia kawl ah a kalmi khuami pakhat cu CDF nih an hmanhmi bomb aa lamh caah hliamhma tuar, tiah an thanh. Laitui khua cu Tedim peng, inn 1000 hrawng umnak khua a si i, Laitui khuami nih bomb an i lamhsual hi a voihnihnak a si cang. A luancia July thla ah khan Sia a kawlmi pa pahnih cu bomb an i lamhsual caah pakhat cu a nunnak a liam i, pakhat cu a kee bul leng ah a mit zong a rak hliamh chih, tiah theih a si.

Thawngpang dang: Nihin August 9, zinglei suimilam 10:00 hrawng ahkhan Shwe Pyi Ta Bayintnaunglampi pawng ah ummi Cornerstone Baptist Church (CBC) ah SAC ralkap le palik an phan i, pastor nupi sayamah Nu Zing le khrihfa bu upa 2 cu palik sakhan ah an kalpi hna, tiah theih a si.

“Nihin zinglei suimilam 10:00 hrawng ah palik 7 hrawng an ra i pastor pa nupi le khrihfa upa 2 cu an kalpi, zei ruangah an tlaih hna kan hngal lo,” tiah khrihfa bu chungtel pakhat nih a chim. Tuzing lei ah CBC Biakinn i hla cawnnak le lam cawnnak an tuah lio ah palik le ralkap nih luhhnawh in an tlaih hna hi a si, tiah a chim chap.

CBC khrihfa bu pastor Pu Uk Ling Thang cu US ah Baibal sianginn a kai lio a si i, a um lo kar ah a nupi le khrihfa bu chungtel 2 tiin minung 3 cu an kalpi hna. Khrihfa bu upa pakhat nih cun, “Ramkhel lei he ai pehtlaimi cu a si lo, pumpak kong ah mi pakhat nih report a tuah caah hlathlai ding in an kalpi hna hi a si ti in kan theih” tiah a chim. Palik nih sakhan ah an kalpi mi hna 3 chung in sayamah Nu Zing cu nau no ngei ka a si caah a chungkhar cu thinphang in an um, tiah khrihfa bu chungtel upa pakhat nih a chim. (Zalen)