Caṭialtu: Salai Lungthli Tum

2020 election ah kan in kianh ve lai’ timi biakamnak. Minung nih biakam kan ser theu, cu biakam cu zapi sin kan langhter lem lo. Biakam a sertu kar ah biathli pakhat a si, cu biakam a zul lomi cu ‘mifirkhu’ kan ti hna.

 

Thantlang peng Chin party EC nih 2016 September(6) ah biakamnak or biachahnak an rak tuahmi a um. Cucu, ‘Lal Maung Cung nih Pi Zatlem le Salai Ceu Bik Thawng cu 2017 by-election caah a kianh hna lai i 2020 election tikah State MP hmunhma caah Lal Maung Cung cohlan cia siseh’ tiah bia an chah. An biachah bantuk in by-election caah EC nih candidate thimnak ah Lal Maung Cung a lut lo, Pi Zatlem le Salai Ceu Bik Thawng an i cuh i Pi Zatlem nih a tei. Nain, Pi Zatlem cu by-election ah a sung than.

Atu 2020 kan hun phan. Salai Ceu Bik Thawng nih Lal Maung Cung hmunhma ah luh ding a sawk than, 2016 biakamnak aa theiter ti lo. Lal Maung Cung nih a cohlang lo, ‘a lawng ti lo’ tiah February ah thawng a thanh. Nain, Salai Ceu Bik Thawng nih a sawk nolh rih. An kar buainak a linsa chin. Caan saupi cu a chung in phisin an timh nain a si thiam ti lo, nizaan kha zapi theih in an buai beh. Ahodah a palh ne?

Biakam a zul lomi minung cu zeitik hmanh ah zumhtlak an si lo, mah zawn lawng an i ruat. Party le miphun a daw taktakmi nih mualpho ding an tih tuk, a si khawh chung in an hrial. Nain mah zawn lawng ai ruatmi nih cun mualpho an tih lo, anmah duhnak biapi bik ah an chiah.

Hika zawn ah ahodah mah zawn lawng ai ruatmi a si? Hodah mualpho a tih lo? Ho nih dah biakam a zul lo? Tuaktan awk ngai a si. Mah pa hi ai thelh tuk, amah he ai saing lomi ah aa ceih tuk’ nan ka ti ko lai, nain ningcang loin thangchiat a tongmi or nek a tongmi ka hmuh hna tikah dirhkamh loin ka um khawh tawn lo caah a si.

A cunglei cabia hi Salai Lungthli Tum nih a ṭialmi a si. Hi ca aṭialmi kong he pehtlai in tangleiah Salai Ceu Bik Thawng nih comment a pek.

Ka nau… kum 2016-7 cankarlak thimnak ah Kawi Aung pa (Pu Lal Maung Cung) nih min a pek ve tihi ka rak thei bak lo. A kan kianh ti zong hi ka thei bak lo. Cucaah rak kan kian ka ti fawn lo. Pi Tlem le keimah lawng nih min kan chiah tihi a dongh tiang ka fianning a si. Pi Tlem (Pi ZT) he an i kianh/kamhmi si le si lo cu ka thei bak lo. Nain cu zong cu ka zum lo. Aruang cu —MP seat kha aho pumpak kan ta hmanh a si lo caah kanmah lawng iceih chung, ikianh chung, ikamh chung– buhtlang idilh chung– khawhmi a si lo.

Thantlang EC zong nih an tuah khawhmi thil a si lo. Candidate kong cu Party Surlu(CEC) nih thimnak lai ah sohluah chiahnak caan kha official tein a thanh i cuhnu ahcun mizeipoh sok cio i cuchungah party mipi nih thim asi– kanmah party tel in mizei party poh nih cucu tuah asi. Na van fiang dek maw? Van tuak law 2016 lio hna cu CNLD party zong kan rak si rih lo. Record ca khi rel law CNDP tiah a record ah ai tial ko khih. Atucu CNLD, party thar, hmatpungtin thar, le party Phunghrampi(Constitution) zulhphung thar in kan kal. Candidate thimnak zongah bylaw zulhphung thar suaimi kan nei, kum 2020 January ni 21 lawngah cucu pengkip EC kan thanhmi hna a si.

Cuhlan kong kha ceih awk um lo. Na lungfianning nai palh bia si lai ka ti. Kei cu ka thei bak lo hih. CNLD cu kum 2019 (June) lawngah party thar in hmatpungtin in a dirmi kan si. Kum 2016 lio i CNDP lio meeting an biakhiahning(na hun chuahpimi) ningin a si ahcun — cu meeting lio i candidate zulhphung an chuahmi pa 10 ti si rua, lakah— ahmun ummi a si lai, ngeihchiah lei ah a nungcang khomi (a neinungmi) a si lai, ti pawl hna ai tel an ti le… cu pawl nihcun a ka kham diam cang lai cuteh :-). Ka nau, a dikmi ttanh na duh na ti caah kai law —adikmi ttanhnak dingah a dikmi theih hmasa a hau ve hnga. Thawngpang cheuchum half information lawng na laak caah luai deuh kan ti lai cu. Na lungrang deuh ka ti ko lai. Keimah asiloah Kawi Aung pa zong hun kan hal chap law na fiang ngai ko hnga nain. Asiloah falsify na tuah hrimhrim, asiloah kan karlak le kan party caah biatuah hrimhrim dek si hnga ?