Ronaldo Fans Caah Thawngchia Taktak Si Cang. An Lunghrinh Cang Ko Hih: Juventus caah thawngchia taktak si cang. Ronaldo le Ramsey zong zawtnak an ngei lai timi an lunghrinh cang hna. Juventus hnu kham Daniele Rugani cu atu lio zawtnak ttihnung Corona Virus a ngei tiah Juventus nawlngeitu hna nih phung ning tein mipi sinah thawngthanhnak an tuah cang. Europe Player chungah Daniele Rugani hi Covid-19 zawtnak nei hmasa bik zong si.

Italy ramchung ah Corona Virus zawtnak angeimi hna hi minung 12462 an phan cang i, mah chungah minung 1045 bak te an nunnak a liam cang. Vawlei cungah Corona Virus a ngeimi a tam bikmi China asi i, Italy hi pahnihnak asi. Juventus hnukham Daniele Rugani cu Corona Virus hrik a ngaih cang caah Juventus player pawl cu hmundang ah an chiah hna lai. Cu pin ah Juventus player chung in Cristiano Ronaldo le Ramsey zong Corona Virus zawtnak hrik an ngei kho men tiah lunghrinh an si cang.

Kan theih bantukin hmaizarh ah khin Juventus le Lyon cu Champion League leg 2 nak aa celh ding an si nain Juventus player tthenkhat hna cu Corona Virus zawtnak hrik an ngei kho men tiin an lunghrinh hna caah an game hi thawn asi kho men. Cu lawng si loin Serie A zuamnak puai zong hi April 3 tiang chuih lo dingin cozah nih thawngthanhnak le nawl a chuah cang. Daily Mail.

||Note: Hi kong hi kanmah nih phuahchop mi le lih le hrohhro in kan ttialmi asi lo timi nan theihthiamnak lai zaangfah kan in nawl hna. Daily Mail nih a langhter ning le an ttial ning tein langhter le ttial chinmi asi. Cun, Ronaldo hi 100%100 in a ngei ko timi fehternak cu um lo. Cucaah kanmah zong nih Daily Mail cherhchan in kan rak ttialmi le thlah chinmi asi.||