Rev. Dr. Hoi Cung Tum Nih Mother’s Day Kong A Chimmi Ah Za Peng Lian Hi Aa Fian Lo Ruangah Si, Fiang Taktak Sehlaw Mah Bia Hi A Chim Ngam Lai Lo

Sermon

Rev. Dr. Hoi Cung Tum Nih Mother’s Day Kong A Chimmi Ah Hi Za Peng Lian Hi Aa Fian Lo Ruangah Si, Fiang Taktak Sehlaw Mah Bia Hi A Chim Ngam Lai Lo

Image may contain: 1 person, smiling, eyeglasses and outdoor

“Na nu maw a tho, na pa dah a tho? Bawipa Ni cu Nu le Pa upat nakah na hman” a ti an timi Cathlah tete ka hmuh lengmang. Evan Tluang Lian nih Facebook a cathlah ah ka nu nakin Jesuh ka dawt deuh a ti ve nak zong ka hmuh. Jesuh ka hngalh hlan in ka Nu dawtnak ka hngalh. Ka nu dawtnak nih Jesuh dawtnak a ka fianter. Ka nu nih Pathian a ka hmuhsak. Zarhpi ni ah ka Nu a tho zungzal i ka pa zong a tho zungzal. Jesuh zong a tho ve ko ti ko usih. Jesuh dawt cu Nu le Pa dawt he aa tthen kho bak lo.

Zarhpini hi Jesuh thangtthat ni lawngah hman na duh sual a si ahcun zarhpini ah rawl zong ei hlah, ti zong ding hlah, a kholh zong i kholh hlah, biakinn zongah kal hlah, cycle zong i cit hlah, thawngttha zong chim hlah, khual zong tlawng hlah.

Ziah ti cun, nang cu zarhpi ni lawng hi pei Bawipa Ni na ti cu. Zarhpi ni lawng hi pei Bawipa thangtthat ni ah na ruah cu. Zarhpi ni lawng hi pei “Thawhtthan ni” ah na ruah cu. Cutluk na si ahcun, Baibal ningin, a ni sarihnak ni ah, mei zong kau hlah hen. Rawl zong chuang hlah hen. Jesuh thlaan ah khin va kal law, va thangtthat. Thlan ah a um lai lo i a umnak hmun ah va kal. Na nu le na pa kha lungrethei thinphang in um ter hna. tiah Za Peng Lian nih a ttial mi ka hmuh tikah ka lau ko, A ngaingai cun mah bia a chim mi hi a fian lo ruangah a si lai ka zumh.

Image result for hoi cung tum

Tutan ah Evan Tluang Lian kong ka chim lai lo. Rev. Hoi Cung Tum nih a chim duhnak sullam hi Za Peng Lian nih 100%100 in a fian lo taktak ruangah hi bantukin a chim ngamnak a si. Rev. Hoi Cung Tum nih a chim duhnak hi fiang cikcek sehlaw mothers day zong hi a hmang ngam ve ti lai lo. A fian lo tuk ruangah hi bantukin a chim ngamnak si lai,”tiah a ruah.

A taktak le ngaingai ti ko ahcun Bible kan zoh ahcun genesis in biathlam tiangah mothers day (nu le pa upatnak) ni nan hman lai timi pakhat tel a um maw? A um lo caah kan hman ding a si reng lo. Bible nih nikhatni in nirukni tiang rianttuan caan a kan pek i, zarhpi ni cu amah Bawipa thangtthat ni ah nan hman lai,”tiah a kan ti.

Bible ah na nu le na pa upat hna timi cu a um taktak, nain na nu le na pa upatnak dingah mothers day, Fathers day va hmang timi hrim Bible-ah na hmu lai lo. Cu ruangah Rev. Hoi Cung Tum nih Bible ning in a chim ve mi a si lai tiah ka ruah. Cun, Rev. Hoi Cung Tum nih a chim rihmi cu na nu le pa upatnak pek na duh hna ahcun inn chungkhar ah upatnak pe ko hna, Bawipa ni tu kha fir riangmang in nu le pa upatnak ni ah hman hi cu Bible-ah um lomi a si,”timi tu a chim duhnak taktak si lai tiin ka ruah.

Cun, Za Peng Lian nih a fian lo taktak mi cu ka nu zong a tho zungzal i, ka pa zong a tho zungzal,”tiah a chim tthan. Mah a bia hi ttha tein tuak ahcun nih chuak zong a si i, amah le mah mual aa phoh bantuk ah ka ruah. Zing fatin te kan nu le pa cu an tho taktak, nain Jesuh Khrih dah ti lo thihnak in a tho tthan mi an um ti maw? cu cu peih chim duhnak si cu.

Cu ruangah kum zakhat leng Khrihfa a si cangmi laimi zong nih biatak tein kan ruah i kan tuak ngaingai a herh cang. Cu lawng hmanh si loin atu ah hin kanmah laimi chung hmanh in Mothers day le Fathers day a hmang duh ti lomi tampi um a si cang hi. A ruang cu mah hna pawl kha an i fian ruangah a si.

A ngaingai ti ko ahcun na nu le na pa upat hna timi cu Bible nih a kan cawnpiak pengmi si ko cu teh. Kan zulh khawh lo ruang tu ah si. Mothers day le Fathers day tham hna hi cu nu hrin thluak fimnak in hman mi le tuak mi a si. Hmang hrim hlah u ti cun ka doh lo nain Khrihfa a simi nih cun Bible ning in kan kal i kan tuah awk si ko lo hme maw ti tu hi ka kalpi ning a si. Palhnak um cun theihthiamnak he. Lian Sang Pa-Ng

Credit: Lian Sang Pa-Ng

A tang hi Rev. Hoi Cung Tum nih Mothers day kong a chim mi a tawi finnak in lak chinmi a si.

Nan i thawh i Mothers day nan ti, Fathers day nan ti, Bawipi ni hi nu le pa upat ni maw si? Nihin ahhin na nu maw tho na pa dah tho? nihin hi Jesuh thihnak le thlan in a thawh ni si na hngal lo maw? Mothers day ( Nu le pa) upat ni kan timi hna hi a dik taktak mi a lo ngai nain Bible ah pakhat hmanh a um lo.

Nu le pa upat hna cu kan inn chungah pei kan upat hna lai cu, nihin ni hi a ho nu le pa ni zong si lo i, nu le pa pangpar tonh ni zong si fawn lo. Nihin ni cu thihnak le thlan in a tho mi Jesuh khrih lawnglawng kan thangtthat ni a si. A hohmanh tthi awih ding zong kan ngei lo, kan ngaihmi cu thihnak le thlan in a tho mi Jesuh lawnglawng upat peknak ni a si. 

Rev. Hoi Cung Tum nih a chim duhnak hi ttha tein rak ngai tthan rih.

Leave a Reply