David Lah kong ka ruah tikah ka lung ah a chuakmi cu: Jesuh min ruangah le Thawngṭha ruangah zultu hmasa hna an rak tlaih hna i taza an rak cuai hnanak vialte, biaceihnak zung ah an rak chuahpi hnanak, fung in an rak tuk hnanak, thong ah an rak thlak hnanak vialte kha a thar in ka mitthlam ah an hung cuang ṭhan hna.

Lamkaltu chung i: Khrih Salṭha hna temtuarnak vialte kha ka thinlung chungah an hung chuak. A phunphun in sual an rak kawl hnanak vialte le a phunphun in lih an rak puh hnanak vialte kha ka ruat ṭhan hna. Peter le Johan hna kha an rak tlaih hna i fung in an rak tuk hna, Jesuh min in biachim lo ding le cawnpiak ti lo dingin nawl an pekmi vialte hna kha ka ruat ṭhan hna.

A kut thir cikcin khihmi ka van hmuh cu, Jesuh kha kut khih bu in Annas nih Tlangbawi Ngan Kaiafas sinah a hei kuatnak hna kha ka mitthlam ah a hung cuang ṭhan. Thah le thongthlak an rak duh hna ruangah a phunphun in lam an rak kawl, an chim lo mi bia an chimter hna, lih phunphun an puh hna, an sualnak an rak kawl hna i sual an rak puh hna, cutin cun an rak tlaih hna i an rak hrem hna, an tuk hna, an serhsat hna, thong an rak thlak hna i an rak thah hna.

Sihmanhsehlaw Pathian salṭhale hna cu mu, Jesuh min ruang i ningzah mualphonak le temtuarnak an tonmi ruangah khan a lawmh tu in an rak i lawm. Pathian Sal David Lah zong hi aa lawm ve ko lai tiah ka ruah ko. David Lah caah Pathian mi hna nih thlacam zungzal ko hna sih.

“Khawngsil pumhnak cun lamkaltu pawl cu an chuak i Jesuh min ruangah Pathian nih ningzah in awk nan i tlak tiah a ruah hna caah an i lawm ngaingai.” Lamkaltu 5:41

“Khrih inmi temhnak kha nan in ve caah a lawmh tu in i lawm u, zeicahtiah a sunparnak cu a langh tikah lunglawmhnak in nan khat lai.” (I Peter 4:13). Abraham Ram Lian Khar