US President Trump nih caan khat lio ah thih deng in a rak uarmi, Princess Diana fapa pahnih lakah a hniang pa, Prince Harry nih zeiruang ahdah a sinak kaltak in Canada ah pem aa timh? A ngakchia tein a nu nih a thihtak ruang ah maw a si hnga, a von tlangval in Hitler/ Niza symbol a cuangmi anki hna aa hruk i, media ah a tar ruang le, US a tlawn lio ah hngalhlomi ngaknu zapi hmuh han ah a ihpi tiah a thang a chia ngaimi fapa nih nuthluai a tthit ruangbik ahhin a si hnga maw?

Jan 8 ahkhan a “instagram” in Prince Harry nih “hi kong hi a chung in caan saupi kan iruah/ceih hnu ah siangpahrang sinak in idin in mahte in khuasak hi ka thim e’ tiah zapi theih in a tar tikah vawlei pi a cul colh. Nizan tihni, Monday ahkhan a hnubik siangpahrang tuanvo in “the annual Commonwealth Service” ah an kal. March 31 ahhin siangpahrang sinak in an tlaihmi rian vialte a dih lai i, cu hnu ah an umnak ding Canada ah an kir lai tiah an zumh.

Zeiruang bik ahdah Princess Harry le Meghan nih an siangpahrang sinak an kaltak? timi hi Vawleicungpi nih an hngalh duhmi le an hal ciomi biahalnak a si. Asinain anmah lei in fianternak an tuah lo caah aho nih hngalh a si lo. Amah belte aho paoh nih Prince Harry nupi, Meghan Markle hi hnulei in chak mawnghtu a si lai tiah an ruah cio caah, “Megxit” tiah min an pek. Meghan ruang ah Princess Harry nih a siangpahrang sinak a hlawt ahcun, Meghan Markle hi ahodah a si?

Meghan outspoken ngaimi, nu covo kong a aupi ngaimi, actress a ttuanmi, African American, kapia a si. A nu hi minak, a pa Mirang a si. 1981 kum ah a chuak. Tuhi 38 a si cang. 2011 lio ah Trevor Engelson an rak i nei i 2013 ah an itthen tthan. Cu hnu ahcun atu Prince Harry he an i um tthan hi a si. Ziah, nuthluai nih England siangpahrang cu a vat khawh?

Prince Harry, Duke of Sussex cu tulio, British Queen, Elizabeth II fapa upabik, Charles, Prince of Wales le Diana nih 1984 ah an hrinmi fapa a si. Prince Harry hi British Siangpahrang tthutdan ah a tthu kho ding 6nk (sixth in the line of succession to the British throne) a si. Siangpahrang thutdan ah a thu kho ding cu nupi a thit tikah, British cozah hngalhmi a si lai tbk phun hna an ngei pinah, Siangpahrang nupi ding ahcun bawi/royal family phun deuh a si ve lai tbk ruahnak hi anmah British ram ah a tlau dih rih lo. Cucaah, Prince Harry nih nutluai, nutluai hman ah African American/ Kapia a tthit tikah hin British Media ah an thlum-al kho hrim lo. Cucaah, British Press nih an soiselmi hi Megan nih a celh hrimhrim lo caah Prince Harry nih a nupi dirpi in Siangpahrang sinak kaltak in anmahte khuasak aa thim hi a si lai tiah ruah cio a si. A dik kho men.

Prince Harry le Meghan Markle nih fapa an ngei i, a min cu “Archie Harrison Mountbatten-Windsor’ a si. Trump nih Diana hi thih deng in a rak uar tiah an chim. Cuti an chimnak a ruang cu a pasal Charles he an itthen cang ka tein pangpar tawm hi tuletu in a kuat tiah an ttial. Credit: Zasang Cinzah

Tu lio vawlei pumpi nih a buai pimi Coronavirus ruangah thaizing thawk in kan fale sianginn an khar lai i, hmaizarh nikhat ni thawk in Denmark sianginn le university vialte zarh hnih chung an khar chung lai i, a herh ningin an zoh than te lai. Kanmah zong US ah Crusade tuah ding kan si nain, caan kan thawn than.
Online tuin Thawnhtha chim khawh kan i zuam lai.

Kan umnak cio in thla fak piin kan cam cio a hau. Zumhnak in kan Bawipa Jesuh Khrih thisen in i thuam cio hna usih. Hawi dawt vialte hna, Bawipa nih in zohkhanh cio hna selaw, luatnak le damnak in pe cio ko hna seh. Kan Bawipa Jesuh min in thluachuah kan pek hna. Amen.

SALM 91:1-3 Himnak hmuh duh ah Cung Nung Bik kha a fuhmi le Lianngan Bik huhphenhnak chung ah aa dormi nih cun, “Bawipa, nangmah cu a ka chanhtu le a ka hupphengtu na si! Nangmah cu ka Pathian na si; nangmah cu kan bochan,” an ti lai. Hmuh lomi thil ṭihnung vialte le thihnak zawtnak vialte chungin him tein an huhphenh hrimhrim lai.

SALM 91:6-7 mui lak i a ummi rai zong kha na ṭih lai lo i chun ceu i mi a that cuahmahmi ngal-eu zong kha na ṭih lai lo. Na pawng ah mi thong khat an thi ko lai, na velchum ah thong hra zong an thi ko lai, sihmanhsehlaw nang cu zeihmanh nih an tawng lai lo.

Halelujah! Amen and Amen.

Abraham Sang Nawl (Monica Pa)