Mipi nih thimmi cozah thlak in 2021 February 1 ah hramhram in uknak a latu SAC nih uknak caan thla 6 kan chap tiah July 31 ah a thanh. National Defense and Security Council meeting cu Naypyitaw July 31 ah tuah a si i uknak caan thla 6 sauh ding in biakhiah a si tiah ralkap tlaihmi thawngzamh nih an thanh.

Than Shwe cozah nih a rak ṭialmi 2008 phunghram ningah SAC nih kumkhat caansau in voikhat le thla 6 caansau in voihnih tiah a zapi te kum 2 chung uknak laknak nawl a ngei tiah aa ṭial. 2021 February 1 ah hramhram in uknak a latu SAC cu a luancia 2022 February 1 ah uknak caan 6 chap cang a si caah atutan thla 6 a sauh ṭhanmi hi a donghnak bik uknak caan sauhnak nawl a ngeih a si.

SAC nih uk caan thla 6 a sauh caah a ra laimi 2023 February 1 tiang a nguh lai i cu caan a dih hnu thla 6 cuungah thimnak a tuah a hau. Thimnak caah timhtuahnak caan kan herh deuh rih ruangah uknak caan kan chap hi a si tiah SAC hruaitu General Min Aung Hliang nih a chim.

Ramkhel lei thiamsang pakhat nih “2023 ah thimnak a tuah lai. Cun ralkap hruaimi party chung in pakhat khat nih rampi hruaitu si ding an i ruahchan. Chimduhnak cu General Min Aung Hliang in President Min Aung Hliang ah thlen khawh ding in an zuammi a si” tiah a chim. 2020 ah tuahmi thimnak a phichuak hrawh hnu ah hramhram in uknak a latu nih tuahmi thimnak doh ding in ramkhel lei thiamsang le ramkhel party pawl nih an chim. Credit: The Chinland Post:

Unau pahnih ralhrang kutn an nunak a liam: Magwe ramṭhen, Myaing peng ah July 30 ah gate hngaktu i thleng ding in a kalmi PDF ralkap pahnih cu SAC ralkap nih an kah hna caah an nunnak liam, tiah theih a si. Myaing peng PDF Battalion 2, Company 1 in ralkap unau Htet Kyi, kum 18 le Paing Kyi, kum20 an si. Zing sml 8:30 hrawng ah gate hngaktu i thleng ding in an kal lio ah, PDF camp he aa naihnak ah SAC ralkap an um i an kah hna caah an nunnak a liam hi a si, tiah Bo Na Kwin nih a chim.

“Annih hi uanau chuak khat te an si, hmunhman humhimnak kan tuah lio ah SAC ralkap nih an thah hna i, an ruak an khanghnak kan hmuh. A kaang dih lomi an ruak pelpawi cu kan khangh ṭhan hna” tiah a chimchap. PDF le SAC ralkap kahdohnak ah cun SAC ralkap bawi pakhat le a kuttang pakhat an thi ve, tiah Bo Na Kwin nih a chim. PDF unau pahnih an ruh cu thlahnak an tuah lai i, cu hnuah an vui hna lai, tiah theih a si.

Ye Oo Peng Inn Khangtu SAC Ralkap Pawl Cu PDF Nih An Kah Hna Caah Ralkap 3 An Thi, Tam Ngai Hliam An Tuar!: Sagaing ramṭhen Ye Oo peng khuate a khangtu SAC ralkap pawl cu PDF nih kan kah hna caah ralkap 3 an thi, tiah Khin U Local Guerrilla Force ṭuanvo ngeitu nih a chim. July 24 lio ah motor pali nih SAC ralkap a chiah hna i, ke in Ye Oo peng khuate 13 ah an lut in innlo an khangh hna. July 28 zanlei sang ah Ṭinṭingyan khua cu thazaang tampi in an luhhnawh i hriamngan in an kah, tiah theih a si.

July 29 zanlei ah Ṭinṭingyan khua um, dawr khan 200 leng le inn za leng cu SAC ralkap nih an khangh. Cu inn a khangtu SAC ralkap pawl cu Depeyin dum kalnak lam chuah ah Khin U local Guerrilla Force(KUGF) Hero Army le Bo Lah Yawng Local Defence Force le PDF hna i bawm in kan kah hna caah SAC ralkap 3 an thi i, tam ngai hliamhma an pu, tiah Khin U local Guerrilla Force(KUGF) nih an langhter.

Myanmar Ram Ah Singapore Nih Tlaihmi Rian 7 Le Tuluk Tlaihmi Rian 1, $1 Billion Man Cu Dinhtak Dingin NUG Nih Ralrin A Pek!: Myanmar ram ah US dollar 1 billion man a simi, Singapore company nih a tlaihmi rian phun 7 le Tuluk company tlaihmi rian phun 1 cu i dinh dingin National Unity Government(NUG) nih ralrin a pek hna. Myanmar ram ah luhlinh in rian a ṭuantu Singapore le Tuluk cu an rian ngolh ding in NUG nih a theihter hna i, “Kan khammi rian nan ṭuan ko ahcun a faak bikmi dantatnak nan i huah lai,” tiah ralrin a pek hna.

NUG nih ralrin a pekmi company pawl cu Singapore Myanmar Satoketayar Solar Power Companny nih Magwe ramṭhen ah dollar nuai 27 leng man 30MW(Megawatt) mei peknak sehzung, Singapore Myanmar Kyeeonkyeewa Solar Power Company nih Magwe ramṭhen ṭhiam ah dollar nuai 28 leng man mei peknak sehzung, Singapore Myanmar Kindar Solar Power nih Mandalay ramṭhen ah dollar nuai 27 leng man 30MW mei peknak sehzung, Pago, Yangon le a dangdang hmun hna ah mei peknak sehzung rian hna an i hmaithlak mi a si. Tuluk Best Garment Company zong nih Yangon ramṭhen ah dollar nuai 29 man sehzung a sak i, cu inn hlannak kongkau rian zong a tlaih chih.