Rampi Chiatnak Ah Siseh, Thatnak Ah Siseh, Kamlo Chuncha Bang A Dir Pengmi NLD! 2020 Rampi Thimnak cu thim hlan in a rak linsa cang, cu ve bantukin thim hnuah a linsa chinchin. Ralkap nih thlerhhronak phunphun an langhter. 2010 hlan kong cu chia ko usih. 2015 le 2020 thimnak nih a langhtermi cu NLD cu ram huap party/ rampi mipi party asi ti kha asi.

Ralkap Dirhmun: Rampi Thimnak hlan, aluancia thla 6 hrawng ah Ralkap Bawi Zik Min Aung Hlaing nih party fate hna he tonnak an rak ngeih ah a chimmi cu” Ka tuah ngam lomi thil zei hmanh a um lo, zeizong vialte tuah dingah aza in ralthatnak ka ngei” tiah a rak chim. Thim hnu ah Bohmuchoh Zaw Min Tun hmang in ” Aanaa kan ting lai lo tinak asi lo” tiah a ti. Cu nih a sawh duhmi cu Aanaa kan tin khawh ti zong asi. Naite ah Min Aung Hlaing nih Phunghrampi hrawh khawh asi zia fiang tein a chim i ram chung ramleng he kan cuanh cio.

Aanaa Tin Khawh Asi Maw? Ralkap tuanbia zoh ah Aanaa an tinnak hmuh asi. Aanaa tin an duh ahcun Phunglam cu an zul lai lo, phunglam zul loin phetsawt in Aanaa a ting balmi an si caah chim khawh asi lo. (Aanaa Cu Ting Hna Sehlaw, Hodah A Dir Lai?) Kawl ram tuanbia cu kan theihpah dih cio, tampi chim awk a um lo.

Ralkap nih Aanaa ting hna sehlaw, atu i ramkheel ka tuan, miphun caah ka tuan a timi cheukhat pawl caah hneksaknak pakhat asi hrimhrim lai. Cheukhat cu Mizo ram, Bengladesh, Thailand, Taluk le Malaysia ah a zaam ding lawngte an si. Asinain, NLD cu zaam bak loin Ram chungah a cawlcang ding an si, aruang cu Kawl ram caah nun thap in a dirmi an si i Kawl ram that caan lawngah aa langmi party le ramkheel riantuanmi an si lo. Kawl ram a chiat ah siseh, a that ah siseh, nun thap in ram caah ram chungah a dir pengmi/ dingmi an si. Cucaah NLD cu chiatnak ah siseh, thatnak ah siseh ka dirpi peng hna lai. Credit: KL John Lian