Ramdang In Kawlram Tlung Mi Nih Phaisa Kongah Kan I Ralrin Taktak A Herh Mi: Ramdang in Kawlram ah a tlungmi nih phaisa thlennak kongah kan i ralrin ngaingai a herh. A bikin Thailand in Kawlram a tlung mi hi ralrin khun a herh bik mi si. Myawady khuapi ah phaisa lemthleng mi Thailand rammi tlaih an si.

Myanmar le Thailand ramri pehtlaihnak asi mi Myawady khuapi ah khuasa Thailand minung Naing Nuan timi pa cu Myanmar phaisa lem hmangin a tlung kalmi hna sinah phaisa a thleng tawn i, December 7-2019 ah khan tlaih asi. Naing Nuan pinah a ttuan pi hawi minung pahnih zong tlaihchih an si. Tlaihmi hna hi Thailand ram Me Sauh khua, Thailand sinak a ngeimi an sinain Myawady khuapi ah phaisa thlennak dawr a ngeimi an si.

Naing Nuan nih hin phaisa lem tampi serchuah in ramdang leiin a tlung kalmi hna sinah tampi a thlen cang,”tiah theih si. Cu lawng si loin Kawlram le China ramri phaisa thlennak zongah Agent a ngei fawn”tiah chim si. Naing Nuan hi Thailand ram fimthiamnak lei ah cozah rianttuan pakhat si i, phaisa lem a sermi hna he pehtlaihnak zong an ngei chih.

A cunglei kong he pehtlaiin China, Thailand le ramdang in Kawlram a tlungmi hna zong nih phaisa kan thlen tikah biatak tein ralrin ngaingai kan hau. Nangmah nih a lem si hna theih lo hmanh ah na thlennak pawngkam minung sin maw? si lo ah a thei mi sinah hlathlainak tuah ta ah a ttha bik. A lem hna na thlen sual ve ahcun na caah a faktuk ve sual lai.