Pu No Than Kap: RAM VANDUAI-RAM VANCHIA: Kawlram hrimhrim hin vei tam vanduainak a tong. Thuanthu zoh tikah mi tlingtlak pawlin a tluansuak in ram hrangah hna an ṭuan ngah dah lo. Mai hmaikhua sial pawl le mi i ksik hmang pawlih thangkam mi ah an tlinnak le an nunnak tiang a liam men theu. Kawlram Long ralkap ‘navy’ leitlun san man siter tumtu Kanaung lal cu a tumtah mi a hlawhtlin hlanah a sungkhat Minkun le Minkungtaing lal fapa pahnih kut ah a nunnak a cem men.

Mifim Zawminkyi U Phuhlaing khal in a fimnak ram hrangah hmang thei lo tiangin thuneitu pawlih hnawn a tuar. Mi ding le fel hminthang Aungsan khal sinak atcilh Kalung U Saw kutah a nunnak a cem men. Burma timi leitlun ih langsar ter theitu UNO General Secretary U Thant khal sinak atcilh Newin ih iksik le huat tuar in a um. Khatlamah ziangah America cu leitlun cakbik le ropibik dinhmun ah a ding thei?

Ziangah ram vantha a si? Ram cakbik le ropibik a si theinak san cu US cun zovek miphun ziangvek vun dum le rang tvk’ khal thleidannak nei loin an tlinnak lawng a zoh ih a hmang thiam. Albert Einstein tivek Judah hnam thluak tha cungcuang cu German rammi si hmansehla a tlinnak a tawp tiang langter thei dingin a hmang thiam. Tuluk le Kala tiangin an hnam sinak le rami sinak zoh loin sii ‘damdawi’ le thil dangdang ah an thiamnak cu a deng tiang hmang thei dingin a vulh thiam.

Sal ih a rak ret mi midumpawl khal Abraham Lincoln vek mi ropi ruangah mi zalen an si phah ih tui ni ah midum President Obama tiang an neih phah. 1957 hnu lawngih US rammi sinak ngah Checkoslovakia suak Pi Albright khal a thiamnak zoh in Foreign Minister ah ret a siih rampi in a hlawkpi phah. Kan ram ve ahcun thuanthu sungih sodeng Maung Tintte san ihsin tui ni tiang “Kei thawn bangaw lo cu ka doral” timi dinpi ringring a si tikah rampi thansonak ding pohpoh niling sawlno bangin an uai in an ziam cih vivo men ding a bang.

Kan Chinmi dinhmun zoh khalle cu thotho. Mi tlingtlak cawisan le hman thiam cu rel hlah, zohfiah dawl lo phuahcop thu thehdarh le huatawknak thusia lengvak sihte cangcel zawn ih zawn ciamco lawng kan thiam tawk a si hrih men. Tu ahcun kan mipi dinhmun cu kan party kan hnam kan peng kan duhzawng, tivek “kan kan kan le ka ka ka” a si vivo ruangah a hnuaiih Dagon Taya ngan mi kan hluan a si bik.“Thudik le ṭha ka hawl Hmanseh thudik le ṭha a um nawn lo.