Ram Pumpi CDM An Tuah Lio Ah Chinram Cozah Rianttuantu Nan Hna Nan I Chet Rih Ko Lai Maw?

Chin News

David C. Thawng: Ram pumpi CDM an tuah lio ah kannih lairam kan dai ngai ko. Ngandamnak zung lawng nih zung kai loin an um ngam atu tiang ah. Zung dang cu CDM an tuah rih lo tiin theih a si. Thla khat thla hnih nihlawh sung tih ah maw chanchung ralkap sal si kan i thim ko hnga? Kan caholh, nunphung, biaknak le miphun sinak tlau seh tiah a chan chan in an rak kan uktu ralkap cozah cu rian sungh ttih ruah ah kan daih ko ahcun ttihnak sal ah kan tang cang tinak a si.

May be an image of 2 people, people standing, outdoors and crowd

Kawlram ah CDM a tuahmi cozah zung riantuan pawl cu a lak bak in mipi nih an ngeihmi vialte an pek hna. A rum ruangah maw? Rum hlah. An ngeih ruangah maw? Ngei hlah. Ralkap sal sinak doh ah an ngeihmi an i hrawm hna. Cu lungrualnak cu an hriam thabik a si i a tthawng deuh. Laimi nih cucu kan pupa chan in kan rak tuah ko tung. Atu a caan lio bak ah hin kan dai ko lai maw? Hruaitu pawl khawika dah an um ee?

Image result for Myanmar CivilDisobedience

Ram pumpi in khua kip le miphun kip nih an tuah lio ah kawl nih nehsawh cemmi sifak bik a sitermi lai miphun daih ko ding cu kan celh cio hnga maw. Ram thawngpang an theih lo maw a si, ngamhlo dah a si hnga ti ka ruat. CDM a tuahmi poah hi tulio ahcun ram dawtu miphun dawtu upat tlak bak an si. CDM a tuahmi cu laitlang khrihfabu zong nih rawl pek ding an si ko lo maw?

Khua nu khua pa nih dirpi ding an si ko lo maw? Cawlcangh caan a si. Tuanbia nih an in zoh ko hna. Nan fale nih an in zoh ko hna. Ramleng um nan unau nih kan in cuanh ko hna. Nan tuah lo ahcun zeitindah kan in bawmh hna lai. Bawipa bochan in le lungrual tein dinlonak cu rak doh ko u. CivilDisobedience MyanmarChallenge -chincdm-SaveMyammar-democracyfor myanmar

Relchih: Yangon lam zawh kan i thawh hlan ah ‘covid zawtnak kan ngah kho, thong kan tla kho, meithal in kah kan tong kho, kan thi kho’ timi kan thei cia dih ko. Nain cu vialte nakin ralkap uknak a letza in tih a nung deuh, kan techin fapar ca tiang ah tih a nung ti kan theih caah hmurka raldoh kan i thawh cio hi a si.

Rammi dihlak caah tih a nungmi kan ral kan tei khawhnak ding caah cun cozah zung riantuantu le bank riantuantu vialte zong nih nan kan telpi cio a hau. Caan zeimawzat chung cu rian kal rih loin um hram ko uh, ralkap dohnak hriamnam tha bik nanmah kut ah a um.

Cozah zung le bank riantuannak ai hel kho ti lo ahcun ralkap uknak aa cawl kho ti lai lo, a tlu colh lai. Kan lung ai rual i pumpak cio kan i tel ko ahcun Min Aung Hlaing tham cu kan tei colh ko lai, atu hmanh khi ‘kai chuah sual cikcek cang hi ta’ tiin ai ther len cang ko lai. By Salai Lungthli Tum

 

Leave a Reply