A voi (72)nak Thantlang khua ah tuah dingmi Chin Miphun Ni ah CNF upa hna biachimnak an ngei lai. Ramkomh Cozah nih biachimnak a pek hna lai tiaih theih a si. Credit: Ram khar

Biachimnak pek an tim hna lo ti a si fawn.

Thawngpang rak rel chih:Chin Miphun Ni Kan Hman Dan Kan I Palh Sual Tawn Ko Rua: Miphun nih National Day an ngei cio bangin Chin Miphun zong Feb 20 cu kan miphun ni ah kan hman ve. Nain ramdang ah cun a ruang tampi ruangah a ni thengte ah kan tuah kho lo. A ruang cu riantuannak ram a si i riantuan kal cio a si caah rian off a har an ti. Miphun ni a chuahkehnak hi fak deuh le thuk deuh in kan ruah ahcun a hlankanh deuh in leave lak khawh a si ko.

Nain lungtak in Miphun pi ni kan sunglawi lo le kan sunsak lo caah a si bik ko. Zarhte he aa tongmi ah kan tuah ti a si nain tampi hmurka in ka theih mi cu Chin National Day cu a nuam lo tuk, a boring tuk, nikum ah ka hman cang i tukum cu ka kal duh lai lo ti a si. Chin National Day hi nuamhnak caah tuahmi a si lo i, zurit in velhnak ni a silo, i lungrual ni le dawtnak ni tu a si deuh. Kan pupa hna hruaitu hna nih lungrualnak he bawi chan uknak an hlohnak ni a si caah upatnak ni a si i lawmhnak ni ti tu khi kan philh lo awk a si.

Mi tampi cu CND hi kumtin chuahmi sawh sawh in kan hman tawn caah nuamhnak puai sunglawi ah kan ruah i kan i nuam khawh lo tikah kal kan huam ti lo. Kumkhat voikhat kan ngeihmi CND hi a thukmi tuanbia a ngei ti hi kan hngalh a hau. A ni thengte ah CND tuah khawh lo a ruang cu riantuannak ram a si caah an si nain zarhte ni mi tam off dah tal ah sunghlawihter ngai kan hau.

Australia ah Laimi kan naule tete Chin National Day a ni taktak hi ni zeizat ni a si tiah ka hal hna i an ka lehmi cu Feb 15,16,17,18,19 hi an ka lehnak a si. Cheukhat nih Feb zarh chung poah zarhte ni he aa tongmi ah tuah a si tiah an ka ti. Nu le pa cheukhat cu CND hi mino hmanmi ni ah a ruat mi an um rih. Nain zei a si poahah kan hmannak ni cu aa lo kho cio lo hmanh tal ah kan Banner tal ah Chin National Day hi Feb 20 a si ti langhter khawh peng kan i zuam a hau.

CND hi nuamhnak men le kumtin tuah tawn a si timi lungput he na hman ahcun aa nuam lo tikah le naa ruahchanh ning in a si lo tikah kumdang ah kal le hman na huam ti lai lo. Upatnak le lawmhnak ni a si timi lungput he na huam maw huam lo maw Chin mi ka si caah keimah sunglawi a si ve timi lungput he kan hman cio a herh ko rua ti ka ruah.

CND kan hman Dan hi kan rak I palh sual tawn ko rua. Chinmi a simi nih kan Chin National Day kan sunsak le sun sunghlawihter lo ahcun miphun dang nih an kan upat piak in sunghlawihter lai lo i sunsakpiak lai lo, kanmah kan ni sunglawi cu kanmah nih upat le sunsak a hau caah, manh le manh lo nakin kan ni sunglawi a si timi te hi kan Laithuam te he hman ve ding a si. Credit:Salai Pa Thawng