Tuzing deilei kawl ralkap le palik cawlcanghnak thawng theih cu lung a nuam lo taktak. CDM caah a inn le lo zuar in ting thong 15 a hlutu Actor Lu Min hramhram in an tleih Actor Lu Min nupi chimnak ah cun zahan deilei suimilam 1 tluk ah palik le ralkap tampi motor in an ra. Meithal an i put. Inn ka zong an boh i inn chung ah an lut. Cun kan pa cu an tleih. An tleihnak ruang zong an chim lo.

Khuazei an kal lai zong zeihmanh an chim lo tiah a ti. Ka hal hna i kan thei lo. Zeihmanh chim hlah an ka ti. Kan sang Khuabawi pa cu a laka a si amah lehlam nih kan hruang zong a boh tiah a ti. Lu Min cu tutan CDM tuahnak ah minta mintami pawl hoatu a si. CDM caah tiin an inn le lo a zuar i sing thong 15 a hlumi zong a si. Tleih ding in nawl an chuah nain tihnak ngei loin mipi lei ah a dir. Si nain atu cu misual palik pawl an tleih tak cang. Chuah zau le luat zau um ko seh.

Relchih: CDM PINLEI AH A UMMI TEINAK THLUACHUAH! Civil Disobedience Movement “CDM” cu cozah thalo khuakhan lairelnak vialte zulh duhlo le ngaih duhlo a si. Nebukhadnezzar nih a phunmi sui milem hmai ah Judah tlangval pathum hna nih an bawh duh lo i an biak duh lo ruangah Judah tlangval hna cu meiphu chungah an tlak hna. Sihmanhselaw an sinah Pathian a um caah mei nih an samfa fa khat hmanh a kang lo i mei rim zong an nam lo. Cucaah siangpahrang nih a chuah hna i cuhlan nakin rian sang deuh a pek hna. “Daniiel 3:1-30”.

Kawlram ah ralkap nih hramhram in nawlngeihnak an lak i thilthalo an tuah tikah mipi nih an nawl zulh duh loin CDM kan tuahmi hi biatak kan tanh a si i thiltha kan tuah a si. Hi ruangah tlaihkhih le thongtla zong kan um lai, virus a chawnhmi zong kan um lai i harsatnak phunphun kan tong ko lai.
Sihmanhselaw biatak a tanhmi Pahian nih a kan bawmh lai i teinak kan hmuh tikah cun kanmah le kan techin fapar hna nih kan ram thatnak le thluachuah theipar kan tlanh te lai. CDM Cawlcanghnak a telmi vialte Pathian nih lam in hruai ko hna seh! Credit: Abraham Sang Nawl