Ralhrangbu Nih Nawlngeih Nak An Lak Hnu Ni 214 Chungah Thah Atong Mi Zat Fiang Tein Thanh Asi Cang. Ralhrang nih nawlngeihnak an lak ni(214) chungah thah a tong mi, minung (1043) tiang an phan AAPP nih September 2 tiang cathanh an chuah ning ah Kawlram chung ralhrang phu hna nih hramhram in nawlngeihnak an lak mi ni 214 chung ah ramchung mipi 1043 tiang hramhram in thah an tong tiah theih a si.

Tlaihkhih a tong mi hna dihlak hi 7768 tiang an phan, tutiang ah thlah a si rih lo mi dihlak cu 6132 an si.Tlaihding nawlchuah mi dihlak cu 1984 an si. Nawlngeihnak la tu ralhrang phu hna nih hramhram in minung an thahnak ah Yangon in minung tambik thanh an tong,cun Mon ramkulh in nunnak liammi hi minung 12 an si, tlaihkhih a tong mi dihlak cu 400 leng an si. The chin post

Thawngdang Kawlram chawlettu crony U Tay Za le a company (Htoo group) cu UK nih kharphihnak ka tuah lai tiah nizan September 2 ah a thanh. Hi hi ralhrangbu he a pehtlaihmi hna cungah United Kingdom nih a voi 7 nak kharphihnak a tuahnak a si. UK foreign secretary Dominic Raab nih U Tay Za le Htoo group cu kharphihnak kan tuah lai pin ah ralhrangbu telin mipi a that tu le fahnak a pemi hna thazaang a pe mi a ho paoh UK cozah nih kan phihkhar lai tiah a ti.

U Tay Za le Htoo Group hna hi 2017 kum in Rakhine ramkulh chung ralhrangbu nih Rohingya miphun hna an thahnak ah an bawmh ruangah atu bantukin phihkhar mi a si tiah UK cathanh nih a langhter. UK cozah nih;ralhrangbu nih uknak a lak hnuin atu tiangah sualnak a ngei lo mi mipi an thah hna, nuhrin covo an buar mi vialte ngol a timh lo lengah a tuah cuahmah rih. Mah bantuk thil a tuah mi ralhrangbu hna hriamnam le tangka in a bawmtu le bawmhnak a pe mi hna vialte cu chawlehnak lei kharphihnak kan tuah hna lai tiah a ti.