Ralhrang Sakhan An Laak Hnu In Hriamnam An Laak Mi TNLA Nih An Langhter. A Ropui Ko

Myanmar News

Manton Peng, Khumone SAC Ralkap Sakhan Cu TNLA Nih An Laak Hnu Ah Hriamnam An Laakmi An Langhter. Shan ramkulh chaklei, Manton peng, Khumone SAC ralkap sakhan cu TNLA nih an kah i an laak hnu ah hriamnam an laakmi social media ah an taar.

December 7, zanlei suimilam 4:30 hrawng ah Manto peng, Khumone ralkap sakhan cu Ta’ang ralkap TNLA nih an kah i an laak khawh. Cu sakhan kahdohnak ah cun 60mm hriamngan telh in hriamnam tam ngai le ralkap hmanmi thilri an laak khawhmi hna cu an pho.

1027 Operation thawk ni October 27 in nizan December 8 tiang ah Ta’ang ramkulh chung SAC ralkap sakhan 53 cu TNLA nih an laak cangnak le hriamnam tam ngai an laak khawhnak kong cu phungning tein an thanh. Cu pin ah December 7, chun suimilam 11:35 ah Kyaukme peng, Mailone peng ṭhen Laegyi ralkap sakhan cu TNLA le Moekok Byuha PDF ṭangṭi phu nih an laak. Cu sakhan kahdohnak ah cun hriamngan telh in hriamnam phun 10 le ralkap hmanmi thilri zong an laak khawh.

Laegyi sakhan kahdohnak ah cun SAC ralkap nih vanlawng hmang in kahdohnak voi 12 an tuah nain TNLA le Moekok Byuha PDF ṭangṭi phu nih an laak khawh ṭhiam, tiah theih a si. Ref: The Chin Post

Thawngpang dang: Mone Khuapi Kahdohnak Ah SAC Ralkap 100 Leng An Thi, Minung 21 Nih An Hriamnam An Chiah. Bago ramṭhen, Mone khuapi kahdohnak ah SAC ralkap 100 leng an thi i ralbawi 3 telh in minung 21 nih an hriamnam an chiah, an chungkhar minung 58 zong an i ap, tiah no.2 thlanglei ramṭhen ral hmunram nih thawng an thanh.

A luancia December 2, zan suimilam 11:40 ah Kyaukgyi peng, Mone khuapi hmunram chung Khah-Mah-Yah 590 Battalion Headquater, Khah-Mah-Yah 599 Battalion Headquater, Mone khuapi palik sakhan, Tharsi hlei sakhan, Kawpin ralkap sakhan cu KNLA, PDF le BPLA ṭangṭi phu nih an rak kah i Phasihingthan le Selamon Operation tiin min an pek.

Cu kahdohnak ah cun Khah-Mah-Yah 590 Battalion Headquater, Mone khuapi palik sakhan le Kawpin ralkap sakhan cu an laak khawh hna i 599 Battalion Headquater le Tharsi hlei sakhan zong an kah, tiah an thanh.

“SAC ralkap nih vanlawng in kahdohnak an tuah ko nain kan i tinhmi Operation ning tein kan tlamtlinh ko,” tiah no.2 thlanglei ramṭhen ral hmunram nih cun an thanh. Mone khuapi kahdohnak ah cun SAC ralkap 100 leng an thi i hliampumi an tam. Hriamngan, hriamhme tiin hriamnam tam ngai an laak khawh pin ah ralbawi 3 telh in minung 21 nih an hriamnam an chiah, an chungkhar minung 58 zong phunglam he aa tlak ning in zohkhenh an si, ṭangṭi phu in thi le hliam an um ve, tiah an langhter.

Thlanglei ral hmunram, no.2 ral hmunram ṭhen nih Sittaung tiva hmunram chung vialte ah Operation kalpi ding a si, tiah phungning tein an thanh. “SAC ralkap pawl le SAC kuttang rianṭuantu vialte cu a caan um liote ah mipi sin ah i fonh in ṭangṭi ding in forhfial kan in duh hna. Mipi zong nih kanmah kan himnak hmun cio kawl in le a herhmi tete cu a hlankan in timhlamhnak ngei cio ding in nawl kan in duh ko hna,” tiah thanhnak an tuah.

Leave a Reply