Ralhrang phu Pu Ngun San Aung cu vanchiatnak nih a tlunh chin lengmang ko ai

Chin News

Pu Ngun San Aung Riankhinhmi Hakha Khua Upa 4 nih an Cohlang Lo. Chin ramkulh Administrative Council Chairman Pu Ngun San Aung nih Hakha khuapi ṭhanchonak committee chungtel ah bochanmi Hakha khua upa 6 rian a khinh hna i cu chung ah cun atu tiang ah upa 4 nih an cohlang lo, tiah kan theih. Pu Thawng Kian nih, “Kei cu ka cohlang lo. An ka thiahmi zong ka thei lo. Cun, mah rian hi ka thiammi zong a si lo caah ka cohlan nakding sullam a um lo,” tiah a chim.

Dr. Thla Cung le Pu Chum Ling zong nih an cohlang lo tiah kan theih. Dr. Thla Cung nih, “Keimah le Pu Chum Ling nih cun kan cohlang lo. Ka Facebook zong ah zapi theih in fiang tein ka ttial ko kha,” tiah a chim. Pu Ral Kham zong SAC Hakha tthanchonak committee chungtel ah rian an khinhmi a cohlang lo, tiah a tunu nih nizan ah a chim.

Pu Cung Hu tu nih cun, “Mah hlan khan voi khat an rak ka chimh i ka al hna. Atutan an ka khumh i ka thei lo. Ca an kan pek hnu lawng in ka theih. Kei cu ka ngandamnak zong nih a pe lo. Zatlangbu lei riantuan ka si i, acozah lei rian hi ka thiammi zong a si lo. Asinain, anmah (SAC) ṭuanvo ngei upa ka ton ta hna lai i ca in rak ṭial an ka ti a si le ka ttial te lai,” tiah The Chin Journal ah a chim. Hakha ṭhanchonak rian committee chungtel ah an khumh vemi Pu Thla Bik tu cu atu tiang kan pehtlai kho lo. Source: The Chin Journal

Kachin Ram Alaw Bum Sakhaan Kahdohnak ah Myanmar Ralkap a Thimi an Tam. Kachin ramchung, Tuluk ramri pawng ah a ummi Alaw Bum sakhaan lak tthan ding Myanmar ralkap nih vanlawng in ni 4 chung pehzul in an doh nain Myanmar ralkap lei in a thimi nitin in an karh, tiah theih a si.

Alaw Bum tlangcung i sakhaan hi Myanmar ralkap nih kum saupi an rak tlaih nain kan hnu March 25 ah KIA nih an rak lak khawh. Cu tlang cu lak tthan ding in ni 4 chung pehzul in Myanmar ralkap nih vanlawng in an kah i, Tuluk ramchung zong vanlawng bomb 6 an vung tla.Cu lawng si loin Myanmar ralkap nih Tuluk ramchung tiang ah an vanlawng an zuanter i Tuluk ram lei in Alaw Bum tlang cu fak taktak in a den nain atu tiang an la kho lo.

KIA chimnak nawlngei Col. Naw Bu nih, “Ni 4 chung pehzul in vanlawng in Alaw Bum tlang an rak kah. Ralkap thazaang an chap chin thluahmah i, kahdohnak a fak chinchin ko lai,” tiah Irrawaddy ah a chim.

Vanlawng hmang in Myanmar ralkap nih an kah pin ah kee ralkap bu hnih nih KIA cu an kai hnawh hna. Asinain, Myanmar ralkap in Battalion Commander pakhat telh in ralkap tampi an nunnak a liam. Cun, a tlawm bik Myanmar ralkap minung 8 a nung in an tlaih hna. Nihin zinglei zong ah Phakanh khua lamzawhtu pawl tthenhmal ding in a rami ralkap motor cu Phakanh khualuh lai ah Landmine in an puah hnawh i, ralkap le palik minung 5 an thi.

Butao lei zong ah nihin ah ralkap motor tlarpi cu KIA nih lampi ah an kah i, kahdohnak fak ngaiin a chuak. A thimi an um le um lo theih a si rih lo. Cun, nizan April 12 ah Moekok ah KIA le Myanmar ralkap an i kap i, Myanmar ralkap lei in minung 10 an thi, tiah DVB nih a langhter.

Momauk peng chung i palik checkpoint pahnih le Tarpein hlei pawng i ralkap sakhaan pakhat zong KIA nih nizan ah an lak cang. March 25 ah KIA nih Alaw Bum tlang an lak hnu in Kachin ramchung hmun kip ah le Shan ramkulh chung ah KIA le Myanmar ralkap karlak kahdohnak a fak chin thluahmah. Source: The Chin Journal, April 13, Yangon (DVB, Irrawaddy)

Leave a Reply