Ralhrang Nih Tualchungmi 5 An Tlaih Hna I An Thah Hna, Kum 80 Tarnu A Umnak Inn Ah Mei In An Khangh Chih. Magway ramṭhen, Htilin peng Htilin-Gangaw lam um khua hna cu an luhhnawh hna i tualchung mi 5 an tlaih hna i an thah hna. Cun minung umnak inn 8 an khangh tiah Yaw Revolution Army-Htilin nih an chim.

Vaute 15,16 ah Htilin peng Shwekhontaing(ရွှေခုံတိုင်ကျေးရွာ)khua ah an lut i khua a hmuh ti lo ruangah ral a hrial kho lo mi kum 80 cungkai tarnu pakhat cu a umnak inn ah mei in an khangh chih. Hteintaing(ထိန်တိုင်း) khua ah a ummi hawi lolo kum 55 pa pakhat le Lei in a rak tlungmi kum 70 tarpa pakhat zong an thah hna tiah theih a si.

Cun Vaute 18 ah Htilin peng Saymintaw(ဆေးမင်းတောကျေးရွာ) khuami thluak tlinglo U Than Myin Aung le U Bo Tin zong SAC ralhrang nih an tlaih hna i an hrem hna hnu ah an thah hna tiah theih a si. Ref: CCN

Thawngpang dang: Dawei District, Aukkyaukwut Khua Le Nyawpyin Khua SAC Ralhrang Nih Mei An Kangh Ṭhan. Tanintharyi ramṭhen, Dawei District, Launglon peng Aukkyaukwut khua le Nyawpyin khua ah SAC ralhrang an lut i inn an khangh ṭhan tiah theih a si.

Nihin Vaute 21 chun sml 12:00 hrawng ah Nyawpyin khua hi an khangh i chunhnu sml 1:00 hrawng ah Aukkyaukwut khua hi an khangh.Inn zeizat a rawh le a kangh hi a fiang in theih kho a si lo tiah theih a si. Zinglei sml 7:00 hrawng ah ti lam in SAC ralhrang hi an lut i hriamngan duhpoh in an kah, inn zong mei an khangh hna.

SAC ralhrang khua chung an luh caah tualchung mi cu kan zaam dih tiah khuami pakhat nih a chim. Kan hnu Vaute 4 lio zong ah Aukkyaukwut khua hi an rak khangh lawng si lo in SAC ralhrang nih an tlaihmi hna tualchung mi 6 hna zong hmunkhat ah an rak thah hna.