Yangon ah umhmun khuarmi UG phu pakhat a simi Burmese Ranger Army-LDF phu umnak inn pakhat cu August 9 ah SAC ralkap nih an rak luhhnawh hna i, an tlaih hna, tiah theih a si. SAC ralkap 30 hrawng nih civil motor pathum le DC Double Cab pakhat in an luhhnawh hna i, UG ralkap 6 an rak tlaih hna, tiah theih a si.

Tlaih a tongmi UG ralkap 6 chung in 2 cu a hmun ah an kah thah hna i, a taangmi 4 cu SAC ralkap nih ralram an kalnak ah ralphaw ah an hman hna, tiah theih a si. “An rak kan luhhnawh lio ah UG ralkap 9 an kan tlaih. Cu chung ah 3 cu kan luat. Dalan nih SAC ralkap thawng a pek hna ruangah a si, tiah kan theih caah hriamnam kan ngeihmi chung in kan si khawh tawk kan kah ve hna. Hriamnam aa dan tuk caah ralkap 6 an tlaih hna, 2 cu a hmun ah an kah thah hna.

“Meithal kuan nih ka ke a khen caah ka zaam kho ti lo. Ka hawile pahnih nih an ka cawi i, an ka zaampi,” tiah tlaih a tong i a luatmi UG, Burmese Ranger Army-LDF phu in ralkap pakhat nih a chim. Dalan nih thawng peknak ruangah Burmese Ranger Army-LDF phu le anmah he ṭhangṭi phu chung in ralkap cheukhat cu SAC ralkap nih an tlaih hna.

Tlaih a tongmi ralkap 6 sinin Glock 19-Gen5 a tawimi zun hnih, Ready Made bomb lung nga, tangka kyats sing 18, 9mm meithal kuan 200 le kutser bomb lung nga cu SAC ralkap nih an rak tlaih, tiah theih a si. Credit: The Chin Post

Thawngdang: Sagaing ramṭhen, Kathar peng, Chaung-U khua ah SAC ralkap Kha Lah Ya 121 le Myohla KPDF cu August 20 ah kahdohnak voi hnih a chuak i, ralkap 5 an thi. Tam ngai hliamhma an pu, tiah Myohla KPDF nih cathanh an chuah. Ayeyarwaddy tiva thluan ah humhimnak laak ding ah Chaung-U khua in a kalmi SAC ralkap 80 hrawng cu, Myohla KPDF nih zanlei sml 5:20 ah an kah hna i, voihnih tiang kahdohnak a chuak, tiah theih a si.

Cu kahdohnak ah cun Myohla KPDF nih hriamngan le hriamhme he an kah hna. SAC ralkap nih hriamngan in an kah ve hna i, Minkyawng Kone khua chung ah hriamngan kuan a tlak caah tualchung mi pakhat hliamhma a pu, tiah Myohla KPDF nih cathanh an chuah. Nizan August 21 ah Karenni ramkulh, Hpruso peng Htipawsu le Htitawku khua pawng ah rallam a sialmi SAC ralkap pawl cu, Karenni ṭangṭi phu nih kan kah hna caah ralkap a thimi le aa hliammi an tam, tiah Loikaw PDF nih cathanh an chuah.

Cu kahdohnak ah cun Loikaw PDF, Karenni hriamtlai KA, KNDF, Central Special Operations Group le Central Battalion 1101 hna i bawm in an kah hna, tiah theih a si. Kahdohnak ah Karenni hriamtlai lei in ralkap hliamhma pumi an um i, Loikaw PDF in ralkap pahnih zong hliamhma faak an pu, tiah Loikaw PDF nih an langhter.