SAC Ralkap Nih Khuafo Khua Bomb Thlaknak Kong Ah Interim Chin National Consultative Council Nih Cathanh An Chuah. SAC ralkap nih Khuafo khuachung ah Jet Fighter in bomb an thlakmi cungah Interim Chin National Consultative Council(ICNCC) nih nihin March 31 ah ngaihchiatpinak cathanh an chuah.

Chin ramkulh, Thantlang peng Khuafo ah SAC ralkap nih March 30 zing suimilam 9:30 hrawngah bomb an thlak ruangah kum 6 ngahchia le kum 9 ngakchia telh in khuami 8 an nunnak a liam pinah khuami 20 tluk hliamhma an pu. A thimi chungkhar le hliamhma pumi chungkhar nan ngaihchiatnak kan in hrawmpi hna, tiah ICNCC nih an langhter.

Atu bantukin nawlngeihnak latu SAC ralkap nih tlangcung mi hna le rammi hna cungah an kan tuahto ning le an kan thahnawnnak hna hi zeihmanh an kan rellonak a langhnak a si. Minung lungthin pu loin an kan thahnawnnak hi ICNCC nih kan cohlang lo i Chin mizapi zong nih nawlngeihnak latu SAC ralkap hi fak piin kan doh hna lai, tiah ICNCC nih cun an langhter. Credit: The Chin Post

Thawngdang: SAC Nih Nawlngeihnak An Laak Ruang Ah Vawleicung Minthang Mark & Spencer Le Japan Uniqlo Company Nih Myanmar Ram An Chuahtak Cang. SAC nih nawlngeihnak an laak ruang ah vawleicung mithang Mark & Spencer Company le Japan Fashion Uniqlo Company cu hmakhatte ah Myanmar ram an chuahtak cang, tiah theih a si.

Hruk-aih le eidin thilri a zuartu vawleicung minthang Britist Company Mark & Spencer cu SAC nih, nawlngeihnak an laak hnu in Myanmar ah nuhrin covo buarnak a tam tuk caah Myanmar ram kan chuahtak cang lai tiin nikum ah thanhnak an rak tuah bantukin 2023 March thla ah Myanmar ram an chuahtak cang, theih a si. Ramdang Company a si i Myanmar ram ah hram a bunhmi H & M | C & A | Primark | Aldi South Group le Tesco Company hna zong Myanmar ram an rak chuahtak cang tiah theih a si.

Ramkip Energy Technologies Institute (Eti) thanhca nih an chuahmi ah Myanmar ram dirhmun cu rianṭuantu hna an caan sunglawi zong ṭha tein an hmang kho lo. Ramkip ah rian a ṭuan kho dingmi rianṭuantu hna ca zong ah ruahchannak a tlawm tuk cang tiin an langhter hnu ah ramdang Company tampi nih Myanmar ram an chuahtak, tiah theih a si.

Cu ṭhiamṭhiam in vawleicung ram tampi ah a lar ngaimi Japan Fashion Company Uniqlo zong Myanmar ram ah nuhrin covo buarnak a tam tuk caah Myanmar ram kan chuahtaak cang tiah cathanh an chuah.