Nihin ah ralhrang nih an motor cit lio mi ah thi lak in an kahmi Siang Hnem Par ruak cu tuzan leiah Falam lei ah an tlunpi lai tiah theih si. Siizung ummi pa pahnih zong an hliamfaak lo caah siizung in an chuak lai. Taantakmi Bawipa nih hnem ko hna sehlaw. Creedit: Salai Williams Hlawnceu

Thawngpang dang: Myanmar ram buainak ruang ah India ram ah aa dor/zaam mi hna, Myanmar ram mi hna khirh kirter țhan ding le hmunhma peknak ding kong India le SAC nih a thli in an i ceihmainak ca a chuak.

SAC Foreign Minister U Wana Maung Lwin nih August 5 nicaan in SAC nih ca a kuat mi chung ah ”Myanmar ram in India ram ah a lut mi hna, Phungning loin ai ṭhialkam mi hna kong he pehtlai in thawng nan theih ahcun Myanmar lei rak theihter/ pehtlai ding in Myanmar Foreign Minister le India Palai cu July 26 ahkhan tonnak an ngei.

Hi kong he pehtlai in Myanmar le India ramri ah ai dor mi hna kuat țhannak kong le hmunhma peknak kong ah ah Mizoram State Cozah nih Kolkata khuapi Myanmar SAC Office ah theihternak ca a kuat ve .

Mizoram cozah nih ca kuatmi ah cun Myanmar ramchung a him lo ruang ah a rak zammi Myanmar ram mi hna nih an hmailei ca tiang ah humhimnak an herh caah ramhnih lutlai hna tonbiaruahnak ngeih ding le tawlrel ding in SAC sin ah nawlnak ca a țial mi zong cu a thli thup cakuat chung ah cun hmuh khawh a si.

India Cozah cu ralzam he pehtlai in hnatlaknak minsen a thu lomi a si caah Mizoram ah a rak zammi ralzam pawl cu Myanmar ram ah kuat ṭhan nawl in Mizoram State Cozah cu nawl a pek nain, Mizoram State Chief Minister Pu Zoramthanga nihcun Myanmar ram in Mizoram State chung ah a rak i dor mi hna hi ka kirter hna lai, lo tiah India Central Cozah cu a rak leh caah nihin tiang Mizoram Cozah nihcun ralzam an cohlan peng i Cozah le Zatlang bu kip nih ralzam camp an sak i an zohkhenh hna.