The Chin Post: A Faak Ngai Mi Kahdohnak In Lehrulhnak Kan Cham Hna Lai: KNDF Tulio Media ah a linsa ngai mi; SAC nih Myanmar ramchung i democracy dirhkamhtu 4 hri thlai in an nunnak an laak mi hna kong he pehtlai in KNDF nih thawng an thanhnak ve i, “A faak ngai mi kahdohnak in SAC cu kan lehrulh hna lai” tiah an thanh. SAC nih hrithlai in dantatnak an tuah mi cu minung cung zawnruahnak tel lo in an tuah mi a si caah faakpi in sual kan phawt, tiah KNDF nih an langhter.

Kahdohnak chung ah SAC ralkap kan tlaih mi hna le dalan hna cu that loin ṭha tein kan zohkhenh hna, tiah KNDF nih cun an langhter i, sinain SAC nih ral ram lawng siloin hmunkip kakip ah zaangfahnak ngei lo in thahnawnak an tuah ruangah SAC cu an hram cah tiang kan doh lai, tiah KNDF nih cun cathanh an chuah.

ULA cathanh: SAC Ralkap Nih Hrithlai Thahnak An Tuahmi Kong Ah ULA Nih Cathanh Chuah! Ko Jimmy le Ko Phyo Zayar Thaw le midang 2 SAC ralkap kut in thah an tonnak kong ah chungkhar, rualchan le Myanmar mizapi hna nih an tuar bantuk in kan tuarpi ve hna i, kan ngaihchia tuk hringhran, tiah United League of Arakan(ULA) nih nihin July 25 ah cathanh an chuah.

SAC ralkap thil tuahmi nihhin ramkip, ram innpa le ASEAN ram hna nih ramchung buainak daihter ding i an rak tawlrelcia mi vialte cu tam tuk a hrawh, tiah United League of Arakan- (ULA) nih an langhter chih. SAC ralkap nih mizapi lungthin le thinhunnak cu tuar khawh lo ding tiang a khoih caah Myanmar ram mizapi nih lehrulhnak an tuah dingmi kong ah thinphang a si, tiah AA nih thanh.

Ko Jimmy le Ko Phyo Zayar Thaw le midang 2 SAC kut in thah an tonnak kong he pehtlai in SAC ralkap lei chimphuannak nawl ngeitu General Zaw Min Htun cu RFA nih pehtlaihnak an tuah nain, zaanlei suimilam 3:00 leng tiangah pehtlaihnak kan tuah kho rih lo, tiah theih a si.