Chinram khualipi, Hakha khuachung ah kan hnu January thla le March tha chung i tlaih a tongmi Chin mino, nu pakhat telh in minung pakua tlaih an rak si. Cu minung pakua hna cu Hakha hrambunh biaceih zung nih minung pariat kum nga thongthlak ding le a dang pakhat kumthum thongthlak dingin biachahpiak an si.

Caan zeimawzat chung an hren hna lawng si loin atu bantukin in biachahnak an tuahpiak mi hna theih tikah lungthin a kekkuai hringhran ko. Tutan i minung pakua thongthlak a tongmi hna hi ralhrang nih an phone check piak a tongmi an si i, CDF ralkap he pehtlaihnak a ngeimi nan si tiin tlaihmi an si hna. harnak tongmi Bawipa tu nih kil vengin humhim ko hna seh. Laknak: KALAY MYO LAIRAWN MINO NEWS

Thawngpang dang: Karenni Ramkulh Ah Kan Hnu July Thla Chung Ah Kahdohnak Voi 48 A Chuak! Karenni ramkulh ah a luancia July thlakhat chung ahkhan kahdohnak voi 48 a chuak i, cu kahdohnak chung ah cun SAC ralkap 88 an thi, tiah KNDF nih nihin August 1 ah cathanh an chuah.

SAC ralkap nih July thla chung ah van lei kahdohnak voi 21 an tuah i, hriamngan kahnak ruangah tualchung mi 2 nunnak a liam, inn pakhat cu mei in an khangh, tiah an thanhmi ah an langhter. July thlachung a chuakmi kahdohnak ah Karenni hriamtlai phufonh nih meithal 21 an lak, tiah theih a si. KNDF ralkap lei in Demoso peng, Dawkhami kahdohnak ah ralkap pakhat a nunnak a liam ve, tiah an cathanh chuahmi ah cun an langhter.

Phyu Peng Siangsangrun Cachimtu Nu Cu Kum 11 Thong Tla Ding In Biaceihtu Nih Biakhiahnak An Tuahpiak: Bago ramṭhen, Phyu peng siangsangrun cachimtu Daw Win Lay Phyo Oo cu Taungoo thong inn biaceih zung nih kum 11 thong thlak ding in biakhiahnak an tuahpiak. Daw Win Lay Phyo Oo cu nikum September 18 ahkhan Phyu khuachung i a nu le pa inn ah SAC ralkap nih an rak tlaih i, phungrelnak cang 50 (J) in taza an rak cuai. July 21, 2022 ah Taungoo thonginn biaceih zung nih Daw Win Lay Phyo Oo cu kum 11 thong thlak ding in biakhiahnak an tuahpiak. Daw Win Lay Phyo Oo cu siangsangrun no.2, Kangyutkun ah cachimtu pakhat a si.