The Chin Post: Hakha Khuachung Dawr Poh Ah Mah le Pumpak In CCTV Bunh Cio Ding In Si-pin Ni Nawl An Chuah: Chin ramkulh Hakha khuachung i dawr pawl ah mahle pumpak in CCTV bunh cio ding in si-pin nih July 26 ah cathanh an chuah. Cathanh ning ah cun a tlai bik August 31 chung ah CCTV cu bunh cio ding a si lai tiah theih a si.

Si-pin lei cathanh ning ah cun atu lio Myanmar rambuai lio hi caanṭha ah i laak in, mihrokhrol pawl nih khuapi chung ah dawrthil mansung pawl fir le suam piak thawng a um lengmang caah Hakha khuapi dawrngeitu hna nih i runvennak; dawrthil le a hngaktu himnak ding ah CCTV cu mahpumpak tein Aungust 31 chung ah bunh cio ding in le bunh dih tikah hmanthlak he zung ah report pe cio ding in an thanh.

Dawrngeitu hna nih CCTV bunh ding in harsatnak an ngeih ahcun zung ah chim ding a si lai i, zung lei nih tawlrelpiak ding a si lai tiah an langhter. Ramchung hmundang ah cun dawr suam thawng theih ding a um nain Chin ramkulh chung ah cun atu tiang cu bantuk thawngpang theih ding a um rih lo, tiah theih a si.

Thawngpang dang: Kani Peng Chindwin Tiva I SAC Ralkap Tilawng 7 Kahdohnak Ah SAC Ralkap 25 An Thi!: Sagaing ramṭhen Kani peng Chindwin tiva ah SAC ralkap tilawng cu PDF phufonh nih an kah hna caah SAC ralkap 25 an thi tiah PDF nih nihin ah cathanh an chuah.

A luancia July 24 ahkhan Chindwin tiva ah SAC ralkap tilawng le thilphor tilawng 7 cu DRPA le Independence Army – IA Kani Guerrilla Force – KGF- Kani Chindwin Revolution Force – KCDRF, Kani People Defence Force 1 – KPDF 1 phufonh hna nih an kah hna i, kahdohnak ah SAC ralkap 25 an thi tiah PDF phufonh nih an langhter.

Cu lio ah nihin July 29 ah Mandalay ramṭhen, Myinchain peng Sanpiah khua ah pyusawhṭi pakhat cu Natogyi People Defense Force nih an thah. PDF nih an thah mi pyusawhṭi sin in Shotgun pakhat le a kuan zun 20 kan laak chih, tiah Natogyi PDF nih cathanh an chuah.

Cobra Hriamtlai Phu Le SAC Ralkap Ni 2 Chung Kahdohnak Ah SAC Ralkap 2 An Thi: Myawady-Waolay mawtaw lam ah Cobra hriamtlai phu le SAC ralkap hna kar ah ni 2 chung kahdohnak a chuak i, SAC lei in captain pakhat le ralkap pakhat an thi, tiah Cobra lei nih an thanh.

July 28 i kahdohnak a chuahnak hmun cu Myawady-Waolay mawṭaw lam pawng tlang kar ah a si. SAC lei in ralkap 2 an thih lengah ralkap 2 hliam faak ngai an tuar i, Cobra lei ralkap pakhat a nunnak a liam tiah Cobra lei nih an cathanh ah an langhter.