Ralhrang Nih Gangaw Pengthar Khua Lut In Mei An Khangh Mei Alh Tuk Cang. Gangaw Peng Thar Lin Khua Ralhrang Nih Lut In Mei An Khangh Magwe ramthen Gangaw peng Thar Lin khua cu September 9 tuzing ah ralhrang nih lut in mei in an khangh tiah theih a si. Thar Lin khua cu tuzing ah ralhrang tam pi cu ra i mipi inn hna cu meikhangh in an hrawh tiah khuami hna nih an chim.

Ralhrang hna cu Phungki inn ah umhmun an khuar, meithal an puah an kah i khuami hna cu rak kan rem uh tiah an auh hna nain khuami hna cu a himnak hmun ah an zaam dih. Ralhrang hna cu Gangaw peng chung khuate hna ah atu le atu an lut i inn le thilri an hrawh i phaisa zong an lak, mipi hna cu meithal in an kah, an hrem hna caah a thi mi le hliam mi zong an um tiah DVB nih a tial.

Thawngdang India ram nichuah lei Assam ramkulh Johar khua ah khualtlawng cu Dozens a phor mi tilawng pakhat nih a dang tilawng pakhat cu a pah i apil caah minung pakhat a thi i minung 30 leng an tlau tiah a hmu mi hna nih September 8 ah an chim.

Bawmhchanhnak rianrang in tuah ding ah Marjuliele Johar nawlngei tu hna cu kan chimh cang hna tiah Assam Vuancichoh Hemantabis Wasama nih Twitter cung ah a langhter. Khuami hna nih anmah tilawng tein an ra i an bawmh hna minung 42 cu an bawmh khawh hna i minung 30 cu an tlau tiah Johar myo Palek bawi nih a chim.