CCN Channel: SAC Ralhrang Hna Nih Tualchungmi Pakhat An Thah I Inn Zong An Khangh. SAC ralhrang hna cu Tanintharyi, Launglon(လောင်းလုံးမြို့နယ်) peng Minyat(မင်းရပ်ရွာ) khua ah lut in khuami pakhat an thah i inn zong mei in an khangh tiah theih a si.

SAC ralhrang hna cu mawṭaw pahnih khat in Launglon peng Minyat khua ah an lut i tualchung mi pa pakhat an thah, cun inn zong mei in an khangh tiah LLPDF nih an chim. Cun SAC ralhrang hna nih Minyat tlang cung in hriamngan, hriamhme in ramtang lei zong an kah len. Khuami inn zong ah an lut i thil an fir hna. Cycle zong 5 an fir tiah LLPDF nih an thanh.

Thawngpang dang: Ngazun Peng Ah SAC Ralkap Cu PDF Nih Bomb In An Puahhnawh Hna Caah 5 An Thi. Mandalay ramṭhen, Ngazun peng Thakyin khua nitlaklei thlanhmun pawng ah cycle in ralvengtu SAC ralkap pawl cu, bomb in kan puahhnawh hna caah ralkap pakhat telh in 5 an thi, tiah Youth Guerilla Counter Revolution (LPDF) hruaitu nih a chim.

February ni 3 zinglei sml 11:30AM hrawng ah Ngazun peng Thakyi khua ah umhmun khuarmi SAC ralkap cu cycle 5 in ralven ding in an kal i, an kir lei ah bomb in PDF nih an puahhnawh hna hi a si, tiah theih a si. “Thakyin khua ah umhmun a khuarmi SAC ralkap chung in ralbawi ngan bik a si, tiah kan theih nain bo zeizatdah a si ti cu kan hngal lo.

PDF a kan ngiartu le a kan auhnawh lengmangmi pa a si i bomb in kan puahhnawh caah a thi,” tiah Youth Guerilla Counter Revolution (LPDF) in hruaitu nih cun a chim. SAC ralkap ruak le aa hliammi hna cu Skat motor in an laak hna i SAC ralkap nih duh paoh in meithal an thlah ko nain kanmah lei in a thimi le aa hliammi kan um lo, tiah Youth Guerilla Counter Revolution (LPDF) nih an langhter. Cu kahdohnak ah Youth Guerilla Counter Revolution (LPDF) le Manshwekyia PDF hna i bawm in an kahdoh hna, tiah theih a si.