Kawl ralkaap lutlai a simi Ralbawi Min Aung Hlaing le a rianṭuanṭi pawl hna cu nawlngeihnak (uknak) an lak hnuah Myanmar rampi zeitindah kan hruaining a si lai timi timtuahnak le saduhthahnak an ngeimi le an timhmi 5 an von langhter cang.

Cucu 2020 Myanmar rampi thimnak ah UEC hna rianṭuan ṭiin Vote diklo a tawlreltu pawl an kawl hna hnuah tlaih i phungning tein hremnak pek ding, Ramdang ah cahmi COVID 19 khamnak sii cu a ran khawh chungin Myanmar ram a phak khawnak hnga Airport pawl on an si lai. Airport cu February 4 in a si lai. Buddha biaknak le biaknak dangdang pawl COVID-19 zulhphung zulh in tonpumhnak ngeih khawh dingin an an tawlrel lai.

Myanmar ramchung khualtlawnnak le Hotel tibantuk pawl COVID-19 zulhphung ning in theihter an si dih lai. Atu dirhmun ah Myanmar ralkaap nih nawlngeihnak (uknak) an lakmi ah Ralbawi Min Aung Hlaing cu nawlngeihnak sangbik a ngeitu a si i President ti hman loin, Chairman tiah min a pek. Tuan deuh i President an pekmi Myint Shwe cu amah sinah nawlngeihnak vialte petu dingah chikhate ca an thimmi a si.

Atubantukin ralkaap nih nawlngeihnak an lak hnuah tuah dingmi cathanh an chuah pah lengmang cang nain, Myanmar rampi thimnak teinak a rak hmutu NLD pawl nih cun atu tiangah ralkaap nawlngeih an lakmi le an ukmi cu an cohlang ve lo i a rianrannak in nawlngeitu le uknak teinak a hmutu hna sinah pekchanhnak tuah dingin le Hluttaw meeting auh auh colh dingah an ti ve. (Chiar NLD, Tatmadaw Truth and Reconnaissance Team)

Ralkap nih nawlngeihnak an lak mi hi USDP nih teinak an hmuh lo ca ah a si, ti cu a fiang ngai ko: Salai Lairamthang

USDP an sungh ruang ah ralkap nih nawlngeihnak an lak ti cu a fiang ngai ko, tiah ramleng Chinmi Myanmar ramkheel zohngiatu Salai Lairamthang nih February 3 ah a chim.

“Mee cazin an puh mi kha cu acawngpiah ti mi i phehnak sawsawh a si. USDP tei ding in lam an kawl khawh tik ah thimnak an tuah te lai. NLD thimnak ah lut duhlo ding in a phunphun in a tuaitam hna lai. Election lut duhlo ding in election phung an ser kanh te hna lai. Cu tik ah NLD an nuar lai i, NLD i tel loin 2010 election bantuk in election an tuah lai i USDP, Tlangcung party le ralkap nih cozah an ser than te lai ti hi kei ka zumhning a si,” tiah Salai Lairamthang nih The Hakha Times ah a chim.

NLD nih zeidah an tuah lai, mizapi nih zeitindah hma an laak lai ti mi nih a karlak ah lai a rel lai. UN le US nih Ralkap thazaang hmang in zeihmanh an tuah lai lo. Mizapi kan biapi. Kanmah nih teinak kan chuahpi khawh. Kanmah cung ah aa hngat. Kan lung aa rual ahcun teinak kan hmuh khawh than mi a si ko, ti zong a cunglei upa nih a chim fawn. Source: The Hakha Times

_____

Copyright ©  Chin World News Evening