Naite ah Thantlang Peng, Vuangtu khua ah Ralbawi Thein Aung Kyaw nih Vuangtu khuami inndawng (3) hna sinah phaisa Ting (13) ningcang lo tukin a hal hna tiah thawng theih a si. Zeiruangah a dah hiti bantukin a hal hna ti a ruang theih a si loh.

Hi kong he pehtlai in Salai Dokhar nih, “Breaking news: Vuangtu khua ah Ralbawi Thein Aung Kyaw nih Vuangtu khuami Inndawng (3) sin in Phaisaa Ting (13) ningcaan loin a hal hna tiah khuami nih phone an ka chawnh. Ralbawi pa cu phone ka chawnh peng ko nain power off a ti peng caah tutiang ka chawn kho lo.

“Zeiruang ah Ralkap nih nihin Democracy chan kan timi tiang ah phaisa ning cang loin an hal thiam. CNF/A le Ralkap remdaihnak sign(minsen) a thutmi an buar si lo maw? Lai media pawl nih va kal hnawh ulaw interview kan tuah piak kho hna law a tha ngai hnga.

“Cun Hluttaw palai pawl zeidah nan tuah peng mipi an tuarmi kong ah zuanhnawh lein cu nan daithlang ngai Tender bawh company pawl he rian tuanti lawng hi na thlihrang hlah seh,”tiah amah pumpak Page ah a taar.

Hi kong he pehtlai in, Australia hrambunh Media ngan pakhat a simi Chin Broadcasting Network nih Ralbawi Col. Solomon Thang Ding cu biaruahnak an ngeihnak ah Vuangtu khuami inndawng 13 sinah Ralbawi Thein Aung Kyaw nih phai a halnak kong cu an hal.

Ralbawi Col. Solomon Thang Ding nih Vuangtu kong he pehtlai in hitihin lehnak a tuah,“Zeitik ah dah a lak hna? Thein Aung Kyaw nan ti maw? Cu bantuk thawng cu kan theih ṭung lo. Zeiruang ah dah a lak hna hnga,” tiah lehnak a tuah.

Independence palai pakhat a simi Salai Dokhar nih a timi cu,“Zeiruang ah Ralkap nih nihin Democracy chan kan timi tiang ah phaisa ning cang loin an hal thiam. CNF/A le Ralkap remdaihnak sign(minsen) a thutmi an buar si lo maw?,” tiah a chim.

Thantlang Peng, vuangtu kongah Ralbawi Thein Aung Kyaw nih khuami sinah a tuahmi kong cu CNF/A lei nih thawngpang zeihmanh an theih lonak Col. Solomon Thang Ding nih cun a chim ve. “Cu thawng cu kan theih ṭung lo,”tiah lehnak a tuah hi a si.

Cu lawng hmanh si loin, 1999 hrawngah Ralbawi Khin Maung Yi nih sualnak ngei lo Pu Lawm Ceu cu fak tukin a hrem i a nunnak a liam. A fawinak in kan chim cun, Ralbawi Khin Maung Yi nih a thah. Saṭial bang a rem i chaak a tiang barh, a ngalpacar ah thir lin in a hnur i zoh awk tlak loin a rak tuah.

Cun, khuate Khuabawi kip fak tuk in a rak hrem hna. Ralbawi Khin Maung Yi kong he pehtlai in, mipi nih zeiruangah dah CNF/A nih an zoh sawhsawh ko hna timi kongah Col. Solomon Thang Ding nih mipi sinah fiang ko in lehnak a a rak tuah chih.

Col. Solomon Thang Ding nih a chimmi cu,“Khin Muang Zi hi kah/thah dingin mi kan thlah ko hna. Asinain, khua cheukhat nih kan khua ah cun kap hlah. Kan khua pawngah cun kap hlah tiah a kan ti. Cun, voikhat cu kah dingin lam in an bawh i zeitindah a um ti a si ah cun, Pastor le Khuabawi pawl cu keh le orh in ai chiah (a vennak hna) hna.

“Cu bu i von kah chih dingah kan nau le kan pale nih hliamhma an tuar dingin le an thih dingmi kan duh lo caah atu bantukin thah khawh loin tlorh thaimi (a luat thaimi) a si. Kah/thah lam cu kan timh ko,”tiah a chim.