Tuni Vaupi 4/20/2020 zaanlei hrawngah Khampat khuami C Group ah khuasami Pu Lal Muan nupi nu Pi Ma Tluang cu Kalaymyo Civil Hospital ah ruah lo piin mual a liam tiah thawng kan theih. Pi Mah Tluang cu dam lonak ruangah Kalaymyo Civil sizungah thlopbul a si hnuah atubantukin mual a liam hi a si.

Lungthin a fak khunmi le lungthin nih a celh bak lomi cu Kalaymyo ah Covid-19 zawtnak a ngeimi an um pah cang ti a si tikah Pi Ma Tluang ruak cu ṭhutpi loin vui a si lai tiah theih a si. A chungkhar caah zeitluk in dah lung a fak laimu ruah cio hmanh ulaw.

Chungkhar nu bik nih atubantuk mual liam tak i mah duhning bantukin nubik ruak an ṭhutpi kho lo a si i lung a fak hringhran ko. Chungkhar sahlawh rualchan hna zong nih a tuarzia na thiamnak hnga thlacamnak in bawm cio hna usih. Tantakmi chungkhar Bawipa tu nih an ngaihchiatnak chungin hnem hram ko hna seh!

Thawngpang thar rak rel chih: Breaking news: Hakha Timit lam Chindwin Star thlang ram mei a kaang, an phalh cuahmah April 20, zaan suimilaam 7:00 tluk ah Hakha in Timit lam, Chindwin Star thlang, Hakha College sirlei zawn ah ram mei a kaang, tiah Hakha Meithat Zung in kan theih.

“Hi mei kaang hi ram mei kaang sawhsawh a si ko. Aho nih a duah i a kaang ti cu hngalh khawh a si rih lo. Hakha Peng Meithat Zung motor 2, Pengkomh Meithat Zung motor pakhat, Penguk motor 2, tiin kan va zuanhnawh. Cun, Sang mino, Palek tibantuk minung thazaang 30 hrawng nih kan zuanhnawh. Asinain, a kanghnak hmun hi thlangleipi a si tik ah motor a luutchuak kho lo. Minung thazaang tu in kan phalh cuahmah. Kan phalh khawh zau ko lai,” tiah Hakha Peng Meithat Zung Lutlai Pu Thian Nuam Maung nih The Hakha Post ah a chim.

Hakha ah hin 2020 January thla in April 20 tiang ah ram meikaang voi 20 renglo a cang cang in hliamtuar le fakpi sungh-zatlak mi ngaingai a um rih lo. Hakhathar pa pakhat belte, Meithat Zung nih sualphawtnak an tuah nain nihin tiang a kong ceih a si rih lo, tiah kan theih.
Photo: Hakha Peng Meithat Zung
Credit: The Hakha Post