Tahan Sanmyo sangah a ummi Pu Zamlawmpara le Pi Zounmawii hna i an fanu Lal Nun Zir kum 11 cu zuri motorcyle in a mawngmi nih a pah i Mandalay Civil Hosiptal ah an tlikpi cawlh i zaanlei suimilam 6:30 hrawngah a nunnak a liam tiah theih a si.

Lal Nun Zir le a nau kum 3 pahnih hna cu hringtu a nu nih Motorcyle in a phorh hna hi khuachung an kal lioah Zuri pahnih cun a pah hna hi a si i a nau zong hliamhma a tuar ve i Lal Nun Zir tu cu a hliamhma tuar kho loin mual a liam hi a si.

A ruak hi tuzaan ah Mandalay P.C.M Quarter ah tuamhlawm a si lai i thaizing suimilam 9:00 Am hrawngah a chuahkehnak khua Sanmyo leiah tlunpi a si lai tiah theih a si. Vanchiatnak a tongmi Lal Nun Zir hi ngakchiate asinain mifel taktak le Pathian a duh taktakmi a si i kan hnukum 2019 ah Baibal a ning piin a rel ruangah laksawng tiang an rak pekmi a si.

Lal Nun Zir nih a kal taakmi a nau zong damnak tlamtling a hmuhnak hnga thlacamnak in bawm cio hna u sih law. Thihnak a tongmi Lal Nun Zir zong khuakhan relnak an ngeih bantukin a ruak zong dam tein a chuahkehnak khua ah an tlunpi khawh nakhnga thlacamnak in bawm cio hna u sih. Taantaakmi chungkhar Bawipa nih hnem hram ko hna seh!

Note: Thawngpang a um ahcun aherhning in thawngthanhnak kan rak tuah tthante lai. Copy Paste nan kan tuahpiak lonak lai kan in nawl hna.