USA, Saint Paul, Minnesota ah Karen pa kum (45) cu zohchia ngaiin thah a si. Hi thah a tongmi Karen pa cu Lay Hae tiah theih a si i, chungkhar le ralzaam dirhmun in USA a phan ve mi an si i, Saint Paul, Minnesota ah a ummi an si.

Hi thil a can hi chipa 26-2020, suimilam 11:15 tluk ah hrawngah a si tiah theih a si. Lay Hae thattu misual pa nih a luhhnawh ahhin Lay Hae nih a himnak caah tiin a biatak tein a cawlcangh chih ve. Asinain misual pa nih cun namte i chuah in atu bantukin zochia ngaiin a thah i a si. Cu ti an buai thawngpang cu an inn pawng a ummi Christine Sampson nih a theh tikah a rannak in St. Paul Police Department a chawnh colh hna.

St. Paul Police Department zong chikhatte ah thil a cannak inn hmun ah an rak phan colh ve. Lay Hae cu chanh timhin an zuan hnawh colh ko nain, a hliamhma a fah tuk tikah, tuar kho loin a nunnak a liam hi a si. Atu bantukin lainawng a um tikah, St. Paul Police Department zong nih thil sining a si khawh chungin hlathlainak an tuah colh ve.

Chiapa 29,2020 thawngzamhtu pakhat nih a langhterning ahcun, Kum 45 a simi Lay Hae a thattu cu midang pi si loin, amah a tupa Saw Thaw kum (16) a si tiah theih a si. Palik nih Saw Thaw cu thil sining an hal tikah, keimah nih ka thah tiah palik sinah thil sining cu a chimh hna. Thah a tongmi Lay Hae le a thattu Saw Thaw cu Lay Hae inn ah hmunkhatte ah zu an ding ṭi ti a si.

Cu ti zu an din pah cun bia i al lengmang i, cu ti bia an i al tlawmpal ah Saw Thaw nih cun a pu Lay Hae cu kut a thlak zong i cuticun an buai tikah, Saw Thaw a namte cu a chuah zau i a hngawng a ah colh hi a si. A pu a thattu Saw Thaw cu Ramsey County District Court nih Second-degree lainawng case in thiam lo canter a si i, Hniang 9 ah biaceih zungah chuahpi ṭhan a si lai tiah theih a si. Chirhchan: Twincities,CBSN Minnesota