Mizoram ah dum rianṭuan in a hlawh fami Halkha thar i khuasa pu Ca Peng fapa pu Hre Kung cu nizaan ah rul nih a cuk. Aizawl sizung ICU ah an chiah hnuah tuzing suimilam 6:30 ah mual a kan liam tiah kan theih. Aruak hi Halkha tlun dingin timhlamh a si caah Covid-19 boruak lio a si caah tlunpi khawh loin Aizawl ah a ruak vui a si.

Hi kong he pehtlai in Vapual Thawng nih,“Nihin i mithi cu kanram lei ah phurh khawhding a si lo caah Khatla sang thlanmual ah phum a si. Zanlei sml 1:30 ah amah thlah pumhnak kan ngei, Carson Baptist Church Pastor Zothanpuia nih caan a hman hnuah thlanmual zongah thlacamnak a kan ngeihpiak, thaizing hi a thlansernak an ngei colh lai.Inn ngeitu le sang YMA nih ṭuanvo an kan laakpiak dih tthiam lai. An sin zongah lawmhnak bia chim a si. A tulio mithi boruak ah cun mi an tam ngai, minung 20 pinah ttuanvo ngeimi lawng an kal tawn nain nihin cu kan tam ngai,” tiah a taarlangh.

Vapual Thawng, “Aizawl, Luangmual sangi dum rianṭuan mi ,Halkha thar i khuasa pu Ca peng fapa pu Hre Kung, kun 41 cu nizaan lei ah rul nih a cuk, Aizawl ah an ratpi i ICU ah an chiah hnu ah tuzing sml 6:30 ah a kan thihtaak ..Halkha lei ah a pa kan hei chawnh,a ruah i Halkha lei phurh khawh a si le si lo an hlat lio a si.

“Duum ngeitu nih Kawlram lei phurh khawh a si ahcun kanmah nih kan sii khawhtawkin sang upa pawl he ttuanvo kan laak lai an ti. Atu hi Halkha lei thawngpaang kan hngak lio.A si khawh lo ahcun hika Khatla thlaanmual ah vuidingin timhlamhnak zong an tuah, Aizawl um laimi zong thawng kan i thanh lio. Thawngpaang thar kan in thanh tthan te hna lai,” tiah a taar.