Myanmar news-Myanmar ram Covid-19 zawtnak ngeimi tuamhlawmtu hna siibawi nu Khin Myo Thu kum (23) cu September ni (18) zinglei suimilam 10:30 tluk ah Covid-19 (Case-4059) zawtnak in Yangon sizung ah a nunnak a liam tiah Yangon ramṭhen Lanmadaw ramkulh sang-10 nakkhuabawi U Tin Wai nih a chim.

“Yangon sizung ah Covid-19 zawtnak tuar in a nunnak a liam. September 13 in sizung ah a um, Covid-19 zawtnak an chek tikah zawtnak a ngei. Cun, amah hi a rak hlan ah zunthlum zawtnak a ngei ciami a si tiah kan theih,”tiah U Tin Wai nih cun a chim.

“Nurse Khin Myo Thu cu Yangon khuapi Lanmadaw ramkulh sang10-nak i Bahusii sizung ah a ummi a si. Amah he a pehtlaimi (neihniam) minung 20 zong Quarantine ah chia in zawtnak an ngeih le ngeih lo cheknak tuah an si,”tiah U Tin Win nih cun a chim chap.

Sii Sayamah Khin Myo Thu cu Irrawaddy ramṭhen Panthawmaw ramkulh Minthasuh khua Uksuh, Cawngzua khua ah a ummi U Aung Zaw Lin le Daw Khin Htay Yi hna i an fanu upa bik a si. Sayamah Khin Myo Thu cu Eco. Major in tlanghra a kum 3 nak a kai liomi a si tiah theih a si.

Myanmar ramchung ah September 10 zaan suimilam 8:00 tiang ah Covid-19 zawtnak a ngeimi hi minung 4467 an umi minung 1130 nih damnak tlamtling tein an hmuh cang. Minung 70 an nunnak a liam tiah Ngandamnak zung nih thanhnak an tuah.