A poi tuk ko. Kan ram harsat ruangah kan fa nau cheukhat cu chungkhar zawnruahnak he ṭih phangpang in mi ramdang ah rianṭuan ah a kalmi an tam ngaingai cang. Singapore, Malaysia, China, Macau tibantuk ah chungkhar zawnruahnak he rianṭuan ah a kalmi an tam ngai i harsatnak tampi an tong ve.

Tutan zongah kanmah Chinmi (Laimi) China ah rianṭuan ah a kalmi pa (2) cu an nunnak liam tiah kan theih. Hi thawngpang hi kan theih cang ka in, hi thawngpang a thei hngaltu sinah zeimawzat hlathlainak kan ngei. Atu i kan taarnak hi thawngpang kan hlat khawhmi chungin kan rak taarlanghmi a si.

Tutan ah vanchiatnak a tongmi hna hi Lainu pahnih nungak Lal Rin Tluang le nungak Bawi Za Len hna an si. Laitlang lei an chuahkehnak khua cu Aungzua khua veve an si. Nungak Bawi Za Len a chung le khat neihniam kan chawnh khawh hna lo ruangah nungak Lal Rin Tluang hringtu a pa kan chawnh i a chimmi zong taar khawh kan izuam ṭhan lai.

Thihnak an tonning le an sining tlawmpal;

Nungak Lal Rin Tluang hi Pu Van Lal Hlu le Pi Thian Nei Thluai hna hi an fanu a si i amah hi kum 23 te lawng a si rih. Aungzua khuami an si. Kan rianṭuantu pakhat nih Pu Van Lal Hlu cu a fanu China a kalnak kong he pehtlai in biahnak a tuah i a chimning ahcun,“Kan hnu thla August ni 14-15 ah China an kal. China ah an kal i an Agent sinah tluang tein an va phan. A kalmi hi minung 60 fai an si. An Agent hna inn ah zaan hnih chung an riak. Cu hnuah rianṭuannak lei panh in an kalnak ah China palek nih lam in an rak bawh (ambush) hna. Cu tikah Rakhine leim pa 2 nih kawl holh in, “Palek ih tlaihnak cha cun kanmah i kan siaremning in zaam hna usih tiah a chim,”nungak Lal Rin Tluang hringtu a pa nih cun a chim.

An fanu a thihnak thawng hi naite lawngah an theih ve i September5 lawngah ruakvuinak caan an hmang kho tiah theih a si. Kan far le pahnih nungak Lal Rin Tluang le nunga Bawi Za Len hna thihlonak an tonnak kong hi chim fian ahar ngaingai. Palek tlaih ṭih in an zaamnak ah khuasih le rawlṭam an tuar tuk tikah, an nun nih a tuar kho ti lo i atu bantukin lampi ah mual an kan liam taak hi a i. A donghnak bik thawng kan theih ding ahcun, kan farle pahnih le Rakhine minung pa 1 telh in lampi ah thihnak an tong tiah theih a si.

Tantaakmi chungkhar Bawipa tu nih an ngaihchiatnak mitthli hnawhpiak in hnem hram ko hna seh. Cun, hi thawngpang kan ṭialnak ah palhnak tete a um khomi a si. Cucaah kan i palh sualmi a um cun an kan theihthiamnak kan in nawl hna. Thawngpang thar a um ahcun upadate khawh kan izuam ṭhan lai. Chirhchan:Ihburlen pictures